Очекуваме растот на продажбата за производителите на кабли да се залади во следните периоди, наведуваат од аналитичкиот тим на „Блумберг Адрија“ во новата анализа за трендовите во овој сектор објавена на „Блумберг Адрија инсајт“. Тие посочуваат дека изминатите три години ја потресоа оваа индустрија, што резултираше со нестабилни трендови на продажба.
„Стабилизирањето на цените на клучните метали ќе донесе добредојдена помош за маржите, особено по двете предизвикувачки години на речиси постојана инфлација на влезните трошоци. Со оглед на стабилизирањето на цените на влезните производи и забавувањето на инвестициската активност (општо во нивните целни индустрии за продажба), малку е веројатно дека ќе опстојува високиот двоцифрен раст забележан во претходните две години“, укажуваат нашите аналитичари.
Клучни показатели
Тие додаваат дека примарните метали во производството на кабли (алуминиум и бакар) претрпеа турбулентен период.
„Цените растеа во 2021 и 2022 година (прикажувајќи двоцифрени стапки на раст во 2021 година и едноцифрени стапки на раст во 2022 година) по падот поврзан со пандемијата. Значителниот пораст од приближно 40 проценти на цените на бакарот, алуминиумот и ПВЦ во текот на 2021 година нуди јасна оправданост за значителниот пораст на пондерираниот просечен раст на продажбата, кој достигна 41,5 процент во истата година“, велат аналитичарите.
Според нив, тоа ја нагласува способноста на производителите на кабли брзо и ефективно да ги пренесат притисоците на влезните трошоци на нивните клиенти.
Што покажува споредбената анализа?
Нашиот аналитички тим направи споредба на работењето на компаниите што се најголеми производители на кабли во регионот Адрија, а врз основа на продажните критериуми. Притоа, аналитичарите групата на компании што се предмет на споредба ја делат на два сегмента: автомобилски играчи („Аптив“, „Кофикаб“ и „Јазаки“) и производители на кабли за општа намена што опслужуваат мноштво индустрии, како градежништвото, дистрибуцијата на енергија итн. („Мивико“, „ТТ кабели“, „Елка“ и „Еурокејбл груп“).
„Во секој случај, компаниите од автомобилската индустрија беа предмет на поголема цикличност и имаа ударни бранови и нестабилност во текот на нивниот раст на приходите. Каблите за општа намена беа поотпорни на падот поврзан со пандемијата и забележаа постабилни трендови во растот на приходите. Затоа, причините за меѓугрупните продажни разлики може да се сведат на целниот пазар и природата на производот“, велат аналитичарите.
Тие додаваат дека двете групи производители на кабли покажуваат слични профили на профитабилност и објаснуваат дека компаниите што се предмет на споредба постигнуваат средни едноцифрени резултати (пондерираните маржи на ЕБИТДА изнесуваат 6,1 проценти во просек во 2022 година).
„Покрај тоа, маржите останаа стагнантни во текот на набљудуваниот период, бидејќи беше искористена моќта на цените, а потрошувачите ја платија сметката за зголемените влезни трошоци. Во извештајот детално ги разложуваме структурите на трошоците за секоја компанија, за да добиеме подлабоко разбирање за разликите во профитабилноста“, посочуваат аналитичарите.
Од нашиот аналитички тим укажуваат дека помеѓу компаниите од автомобилската индустрија, „Аптив“ има најдобри маржи, додека маржите на „Кофикаб“ се на половина од оние на „Аптив“.
„Повторно, потврдуваме дека тоа се должи на природата на производот - ’Аптив’ произведува жици што се посложени од основните кабли произведени од ’Кофикаб’“, велат аналитичарите.
Тие додаваат дека производителите на кабли за општа намена успеваат да работат со повисоки маржи.
„Ние веруваме дека фокусот на одредени индустрии и понудата на поширок спектар на производи по пониска цена на овие играчи им даваат конкурентна предност во споредба со автомобилските играчи“, се наведува во анализата.
Трошоци за вработените
Нашите аналитичари посочуваат дека трошоците за вработените даваат дополнителен увид во профитабилноста.
„Највисоки трошоци има во Словенија и во Хрватска - земјите во регионот во кои животниот стандард на работниците е највисок. Трошоците се најниски во ’Аптив’, што е логично, ако се земе предвид дека е производствен капацитет базиран на аутсорсинг“, велат аналитичарите.
Тие посочуваат дека соодносот продажба по вработен и трошоци по вработен дава дополнително разбирање за разликите во профитабилноста.
„Производителите на кабли за општа намена како „Мивико“ и „Елка“ можат да се пофалат со високопродуктивни работници. Играчите во Босна успеваат да ги одржат трошоците за вработените ниски додека имаат висока продажба по вработен, што укажува на ѕвездена продуктивност на трудот. Од друга страна, „Аптив“ се извлекува со тоа што најмалку ги плаќа своите работници (во регионот). Бројките се дури и пониски отколку за регионалните економии со релативно понизок животен стандард, како што е Босна“, објаснуваат од нашиот аналитички тим.
Управување со обртниот капитал
Тие укажуваат дека деновите за обрт на средствата се во корист на кабелските играчи во регионот.
„Тие успеваат да ги задржат доставувачите и навремено да ги наплатат побарувањата (периодот за намирување на долговите е подолг во однос на периодот за наплата на побарувањата). Брз обрт има и на инвентарот, бидејќи производството главно се заснова на нарачки, а минимални се резервите што остануваат да собираат прашина“, велат аналитичарите.
Тие посочуваат дека дури и во доменот на производството на автомобилски кабли, кое вклучува сложени приклучоци за жици, временската рамка од нарачката за купување до завршувањето на финалниот производ подготвен за инсталација обично се протега околу 10 дена.
„Автомобилските играчи како ’Аптив’ и ’Кофикаб’ имаат особено лабави услови за плаќање со доставувачите. Тоа произлегува од претходно споменатата подредена позиција во нивниот однос со клиентите - големи ОЕМ (од англиски: original equipment manufacturer). Тие не се во можност да ги наплатат побарувањата во исти временски интервали како и општите производители на кабли, што следствено доведува до одложени плаќања на доставувачите“, објаснуваат аналитичарите.
Тие додаваат дека значително намалување на деновите потребни за намирување на долговите може да се забележи во изминатите две години, опаѓајќи од просечните 84 дена во 2020 година на 50 дена во 2022 година.
„Се чини дека компаниите имаат приоритет на минимизирање на одложувањата во испораката и заштита на односите со критичните доставувачи во услови на ограничувања во синџирот на снабдување“, велат аналитичарите.
Очекувања
Според нив, пазарите на крајните корисници ќе продолжат да ги одредуваат трендовите на побарувачката.
„Познато е дека автомобилскиот сектор е цикличен и тешко може да се предвидат трендовите на побарувачката. За загатката да биде поголема, 2020-та беше лоша година, што ги прави претпоставките и проекциите уште покомплицирани. Сепак, стабилизирањето на синџирот на снабдување и враќањето на нови регистрации на автомобили ни даваат ентузијазам“, велат аналитичарите.
Тие додаваат дека производителите на кабли за општа намена имаа корист од невидениот раст на продажбата на крајните пазари, како што е градежништвото, но како што растот бледнее, тие очекуваат и намалување на продажбата.
„Сепак, нивниот основен раст е обезбеден од бизнисот со дистрибуција на енергија и клауд-бизнисот, бидејќи електричната мрежа и центрите за податоци продолжуваат со нивното постојано проширување“, посочуваат аналитичарите.
.webp){kind=icon}
