.webp){kind=icon}
ХСБЦ (HSBC Holdings Plc) објави нова програма за откуп на акции во вредност од 3 милијарди долари, откако за третиот квартал објави профит што не ги исполни очекувањата, а од друга страна трошоците се зголемија.
Банката со седиште во Лондон објави добивка пред оданочување од 7,7 милијарди долари за трите месеци до септември, што е помалку од 8,1 милијарди долари претходно проценети од аналитичарите.
Оперативните расходи се зголемија за два отсто во однос на истиот период претходната година поради повисоките трошоци за технологија и плаќања поврзани со перформансите. Од банката исто така планираат да ги зголемат бонусите за изведба за некои вработени, што ќе резултира со уште повисоки трошоци. Потегот доаѓа додека Британија продолжува со плановите за укинување на ограничувањето на бонусите на банкарите, по плановите откриени од владата на Лиз Трас минатата година.
Откупот ќе започне наскоро и ќе ја намали стапката на клучниот капитал за 0,4 процентни поени, соопшти банката.
„Сега најавивме три откупи на акции во 2023 година во вкупна вредност до 7 милијарди долари, како и три квартални дивиденди во вкупна вредност од 0,3 долари по акција“, посочи во соопштението главниот извршен директор Ноел Квин. „Ова го истакнува значителниот капацитет за дистрибуција што го имаме, додека наедно најавуваме дека продолжуваме да инвестираме во раст“.
Британската банка, која го генерира најголемиот дел од своите приходи во Азија, троши повеќе ресурси во регионот за да ги искористи предностите на пазарите што галопирачки растат и забележа „добри перформанси на богатството“, особено во Хонгконг, се наведува во соопштението. ХСБЦ месецов се согласи да го купи портфолиото за малопродажно управување со богатство на „Ситигруп“ (Citigroup Inc) во континентална Кина, додавајќи околу 3,6 милијарди долари во средства и депозити на клиенти во 11 големи града.
Изгледи
Сепак, бавниот економски раст на Кина и постојаниот пад на недвижностите се предизвик за многу бизниси што сакаат да се прошират во втората по големина економија во светот. Резервирањето за кредитните загуби на банката изнесуваше очекувани 1,1 милијарда долари за кварталот, а половина од тој износ беше поврзан со кинескиот сектор за комерцијални недвижности.
„Продолжуваме внимателно да ги следиме ризиците поврзани со нашата изложеност на секторот за комерцијални недвижности во континентална Кина, при што останува одреден степен несигурност во однос на идната економска перспектива, особено во Британија“, се истакнува во соопштението на ХСБЦ.
Заемодавецот ја задржа својата цел за двоцифрен поврат на капиталот, додека годинава очекува нето каматен приход од над 35 милијарди долари. Неговите изгледи за очекуваните кредитни загуби исто така останаа непроменети.
