Царините на Трамп за алуминиум ги зголемија трошоците на „Рио Тинто“ за 300 милиони долари

Рударскиот гигант „Рио Тинто“ соопшти дека американските царини за неговиот алуминиум произведен во Канада генерирале бруто трошоци од над 300 милиони долари во првата половина од годината, што е уште еден знак за тоа како трговската агенда на претседателот Доналд Трамп ги потресува синџирите на снабдување со метали.

Вториот најголем рудар во светот е и најголемиот производител на алуминиум во Канада и продава огромен дел од металот во САД. Од компанијата изјавија дека имала бруто трошоци од 321 милион долари поврзани со американските царини за алуминиум, но додадаваат дека „значителен дел“ од тоа е вратен од повисоките премии за продажба во САД.

Металската индустрија се прилагодува на трговскиот хаос што го предизвика Трамп оваа година. Тој во март воведе генерални царини за увоз од 25 проценти за челик и алуминиум, пред да ги зголеми на 50 отсто во јуни. Планираната царина од 50 проценти за бакар веќе предизвика хаос на пазарот, а администрацијата испитува потенцијални мерки и за други метали.

Bloomberg

 

Од „Рио“ велат дека премиите на американскиот пазар - платени покрај берзанските цени - брзо се прилагодиле на почетната царина од 25 проценти, но не го компензирале целосно нивото од 50 отсто до крајот на вториот квартал. Во првата половина од годината компанијата испорачала околу 723.000 тони алуминиум во САД, што е еквивалентно на околу три четвртини од нејзиното производство од Канада.

Фјучерсите што ги следат цените на алуминиумот во САД укажуваат на повисоки трошоци за американските купувачи. Договорите поврзани со премијата за металот испорачан на Средниот запад речиси тројно се зголемија оваа година и достигнаа околу 66 центи за фунта, највисоко од 2013 година.