Италијанската Серија А планира да ги заобиколи приватните инвестициски фирми и самостојно да произведува и пласира медиумска содржина и права за емитување за да може да се врати во играта со моќните фудбалски лиги од Англија и Шпанија.
Највисоката фудбалска организација во земјата - домот на Интер од Милано, кој се бори за престижната титула во Лигата на шампионите следниот месец - презема ризичен потег со надеж дека производството и маркетингот на сопствена содржина ќе ѝ донесат поголем профит и ќе ѝ го вратат старото богатство.
Генералниот директор Луиџи де Сиерво тврди дека италијанскиот фудбал може да го врати својот поранешен сјај, дури и без директно вложување капитал од инвестициските фондови. Тие имаат цел да ги зголемат приходите од ТВ-правата на најмалку 1,55 милијарда евра (1,7 милијарда долари) годишно, во споредба со помалку од 1,25 милијарда евра остварени оваа година.
„Се зголемува оптимизмот дека италијанскиот фудбал може да се искачи на врвот на светскиот фудбал како што беше во старите добри времиња од 1980-тите и 1990-тите“, рече Де Сиерво во интервјуто во Рим. Идејата е да се донесат талентите назад во куќата.
Де Сиерво, кој има 54 години, е извршен директор на Серија А од 2019 година. Тој претходно беше директор на агенцијата за спортски права Инфронт и менаџер во италијанската државна телевизија Раи.
Серија А, некогаш најбогатата и најпрестижна фудбалска лига во Европа, заостанува во однос на приходите и меѓународниот дострел. Во 2021 година, обидот да се продаде удел од 2 милијарди долари во нова компанија за права на медиумите на група инвеститори пропадна откако планот не успеа да добие поддршка од доволно клубови. Приходите од ТВ-правата на лигата заостануваат, што претставува нешто повеќе од половина од приходите на Ла лига во Шпанија во 2022 година.
Во 2021 година, шпанската врвна лига постигна договор со „ЦВЦ Капитал партнерс“ (CVC Capital Partners) да инвестира 2,1 милијарди евра во тимови, давајќи им удел во бизнисот со продажба на медиумски права. Една година подоцна, француската лига му продаде 13 отсто од акциите во комерцијалниот дел на Професионалната фудбалска лига (Ligue de Football Professionnel) на ЦВЦ (CVC) за 1,5 милијарда евра.
Сепак, германските клубови неодамна се откажаа од планот да продаваат дел од приходите од домашни и меѓународни трансфери на инвестициски фондови.
Медиумски права
Серија А одлучи да не им ги продава медиумските права директно на приватни инвеститори, туку да развие сопствен производ, кој вклучува преноси во живо, моменти од натпревари и содржини на социјалните мрежи, а потоа да им понуди на инвеститорите можност да инвестираат во овој нов производ.
Планот на Де Сиерво да продолжи самостојно е потпомогнат од силната сезона за италијанските тимови, со Интер, Рома и Фиорентина, кои се натпреваруваат во финалето на најпрестижните европски турнири. Неодамнешната победа на Наполи - поранешниот тим на Диего Марадона - во Серија А предизвика прослави низ светот и го обнови фокусот на лигата.
Сепак, Серија А не ја затвори вратата за странски инвестиции. Неделава беше најавена аукција за домашни ТВ-права за да се обезбедат минимум 1,2 милијарда евра годишно. Доколку традиционалните радиодифузери и агенциите за медиумски права не можат да ги исполнат барањата на лигата, Серија А планира да им понуди на фондовите можност да инвестираат во медиумското партнерство на лигата во текот на десет години.
Лигата, како што изјави портпаролот, ја именуваше компанијата „Лазард“ за свој советник во преговорите, со задача да ги процени и капиталните инвестиции во компанијата и заемот.
Во меѓувреме, Серија А организира тим за продажба на меѓународни права, со цел да ги зголеми годишните приходи на 400 милиони евра од сегашните 250 милиони евра.
Лигата инвестираше и во најсовремен радио и ТВ-продукциски центар. Во септември ќе започне и своја радиопрограма, од покривање натпревари до ексклузивни програми во кои поранешните шампиони и тим-менаџери ги презентираат своите анализи.
„Ова е само отскочна штица за лансирање сопствена ТВ за една година“, рече Де Сиерво.
.webp){kind=icon}
