text size
Најмалку 300 нови вработувања и 50 милиони евра во опрема и нови технологии предвидува новиот инвестициски циклус на „Костал Македонија“, кој ќе почне во јули годинава, а предвидено е да трае до крајот на 2026 година. Тоа го соопштија на денешната средба со новинарите генералниот менаџер на компанијата Виктор Мизо, главниот оперативен директор на „Костал аутомотив“ и претседател на „Костал“ за Европа, Хансјоерг Херман, и Кристијан Клајн, извршен потпретседател за човечки ресурси во групацијата.
Најновите системи за хибридни електрични возила на групацијата „Фолксваген“ , односно „Фолксваген“, „Ауди“, „Шкода“ и „Сеат“, системи ексклузивно за глобалното производство на „Фолксваген“ ќе се произведуваат во Охрид.
„Ова е нова понапредна технологија од постојната што ја имаме. Ова ќе биде нов 11-киловатен систем. Истовремено ќе имаме и нови покривни модули за групацијата 'Мерцедес', што значи дека сето тоа што е од ’Мерцедес’ од класите А, Б и Ц, вклучувајќи ги и електричните возила, како и покривните модули, ќе се произведува тука“, истакна Мизо.
МИА
Тој појасни дека во фабриката на „Костал“ во Охрид ќе се произведува и најновата скинтек-технологија (SkinTec) што во иднина ќе се применува во производството на возилата.
„Според ланските околу 100 милиони евра годишен обрт, ние планираме до крајот на оваа декада да стигнеме до обрт од над 550 милиони евра, што значи дека би пораснале повеќе од пет пати. Со овие дополнителни технологии најголемиот дел нови вработувања нема да бидат само од луѓе што ќе работат на производствена линија туку и вработување на инженери и техничари. Во блиска иднина планираме да имаме и дополнителен центар за развој, за креирање на производствените линии“, истакна Мизо.
Тој забележа дека компанијата, но и општо странските инвестиции во земјава добиле поддршка од државата за усогласување на царинските стапки и адаптирање на целиот процес на државна помош.
„Но постојат некои работи што сметам дека треба да се подобрат. Се очекува подобра и подлабинска поддршка од страна на институциите на државата, како и усогласување и изедначување на условите за третман. Тоа е неопходно бидејќи сите компании треба да играме по исти правила и истовремено исполнување на инфраструктурните обврски“, додаде Мизо.
Компанијата „Костал“ во Охрид почна со работа од 2016 година и во моментот има над 1.000 вработени.
.webp){kind=icon}
