.webp){kind=icon}
И покрај моменталната сила на американскиот пазар на трудот, компаниите објавија повеќе од 250.000 укинувања на работни места од почетокот на четвртиот квартал минатата година, според податоците од „Челенџер, Греј енд Кристмас“ (Challenger, Grey & Christmas Inc.). Иако изгледаат застрашувачки, броевите на насловите страници во никој случај не можат да го пренесат разорното влијание што го предизвикува губењето на изворот за егзистенција.
Зборував со Френ Мекки-Рајан, професорка по менаџмент на Колеџот за бизнис во Рено, на Универзитетот во Невада, која ги проучувала психолошките влијанија на невработеноста. Таа вели дека првичните реакции може неверојатно да варираат: некои лица контактираат со своите пријатели и сакани, додека други се самоизолираат; некои веднаш аплицираат за нови позиции, додека други го избегнуваат тоа.
Сепак, постојат некои основни правила што може да ги практикувате за да останете оптимистични и продуктивни додека не ја добиете следната позиција.
1. Зачувајте си го здравјето. Мекки-Рајан вели дека дел од она што го видела предавајќи им на студенти веќе две децении може да се примени и кај луѓето што се справуваат со притисокот од отпуштање. „Што се случува за време на завршните испити? Нашите студенти јадат еден куп глупости, не се тушираат, не спијат доволно“, објаснува таа. „Кога сме под голем стрес, обично не носиме одлуки што ќе ни помогнат да бидеме ефикасни“. Треба да го вложите најдоброто од себе во процесот на барање работа, а тоа започнува со одржување на основните здрави навики.
2. Создајте нова рутина. Ненадејната загуба на работата значи и ненадеен потрес во вашата дневна рутина. Брзо променете го тоа. „Можеби нема да започнете со ажурирање на вашата биографија веќе наредниот ден“, вели Мекки-Рајан. Но од клучно значење е да ги структурирате вашите денови за да продолжите да се чувствувате продуктивно. Во повторното создавање на дневната рутина, додајте работи што прават да се чувствувате „заштитено, ефикасно, позитивно, силно“, вели таа, како што се вежбање, практикување на омиленото хоби или користење на можноста да ги оставите децата на училиште.
3. Проценете ги финансиите. Нема потреба да брзате да ја ставите вашата куќа на продажба. Но анализирајте ги бројките од хипотекарните плаќања, училишните такси и другите трошоци наспроти сите испратнини и заштеди и направете соодветни промени во трошењето. Мекки-Рајан советува да си дадете простор за дишење, бидејќи процесот до наоѓање нова работа можеби ќе трае подолго отколку што мислите. (Видете ја следната точка.)
4. Бидете реални. Запознајте се со фразата „инокулација против назадување“. Тоа е идејата дека ако имате реални очекувања во вашето барање работа, тогаш одбивањето нема да го сфатите толку тешко. „Процесот е многу сличен на ролеркостер, а е многу помалку како: О, можам да го најдам ова токму сега и мојот напредок ќе биде предвидлив“, нагласува Мекки-Рајан.
5. Користете ги достапните ресурси - сите. Накратко: не обидувајте се да го направите тоа сами. Се разбира, искористете ги предностите на услугата за приспособување (анг. outplacement service) ако вашиот работодавец ја нуди или можете сами да добиете пристап до неа. Негувајте ја вашата мрежа на контакти надвор од луѓето што ги познавате директно. „Вашите врски од втор степен, врските од трет степен се оние што можат да ви помогнат да најдете нови можности“, вели Мекки-Рајан. Понекогаш поддршката од најблиските луѓе, сопружниците, родителите, па дури и постарите деца, може да изгледа како притисок. „Многу луѓе наоѓаат помош и во заедницата на луѓе со кои имале слично искуство. Тоа понекогаш може да биде во форма на професионални организации, но може да бидат и неколку пријатели што се отпуштени, при што можеби спонтано ќе се соберете и ќе разговарате за вашите чувства“, вели таа.
