Банката на Америка ќе ги казнува младите аналитичари што прифаќаат работа кај конкуренцијата

Банката на Америка (Bank of America Corp.) врши притисок врз своите аналитичари во инвестициското банкарство да соопштат доколку прифатиле понуда за работа на друго место и ги предупредува дека ќе бидат преместени на друго работно место во рамките на банката доколку се случи тоа. Тоа е најнов обид на Волстрит да ги спречи одливите кон приватни инвестициски фондови и други конкуренти.

Според лице запознаено со ситуацијата, на младите банкарски аналитичари менаџерите им бараат да откријат дали имаат нова можност за вработување. Доколку прифатат идна понуда, тие најверојатно ќе бидат преместени во друга единица во рамките на банката, изјави истото лице, кое побара да остане анонимно поради чувствителноста на информациите.

Претставник на Банката на Америка одби да даде коментар.

Банките на Волстрит возвраќаат на агресивните напори на индустријата за приватен капитал да регрутира млади банкарски кадри уште на почетокот на нивната кариера. Компаниите „Ситигруп“ (Citigroup Inc.) и „Голдман Сакс“ (Goldman Sachs Group Inc.) се меѓу оние што неодамна презеле чекори за да ги обесхрабрат аналитичарите да прифаќаат идни работни места по краток ангажман, со што во крајна линија заминуваат кај конкуренцијата.

Иако обврската за известување во Банката на Америка веќе е дел од годишниот кодекс на однесување и детално е наведена во писмата за вработување на новите ангажирани лица, компанијата во изминатите денови ја повторила пораката преку нивните менаџери, изјави истото лице.

Аналитичарите на Банката на Америка што нема да ги пријават прифатените понуди за вработување во рок од една седмица ќе се смета дека го прекршиле кодексот на однесување и ќе се соочат со дисциплински мерки, вклучувајќи и отказ, наведе лицето.

Минатиот месец „Ситигруп“ почна да бара од своите аналитичари во инвестициското банкарство да ги пријавуваат понудите за работа, при што секој случај ќе се оценува поединечно.

„Голдман Сакс“ ќе бара од новите аналитичари на секои три месеци да потврдуваат дали прифатиле понуда за работа надвор од компанијата.

Во меѓувреме, „ЏП Морган“ (JPMorgan Chase & Co.) соопшти дека ќе отпушта аналитичари што ќе прифатат работа надвор од банката во рок од 18 месеци од нивното вработување, додека компании од приватниот пазар, како што е „Аполo глобал менаџмент“ (Apollo Global Management Inc.), најавија дека ќе ги намалат таквите практики на регрутирање во рана фаза.

Во мај „Морган Стенли“ (Morgan Stanley) воведе политика со која се бара од младите банкарски аналитичари веднаш да пријават доколку прифатиле понуда за идно вработување надвор од банката. Оние што нема да постапат според оваа обврска може да бидат отпуштени.