Приходите на „Опен еј-ај“ надминаа 40 милијарди долари пред ИПО-то

„Опен еј-ај“ (OpenAI) е на пат да оствари годишни приходи од повеќе од 40 милијарди долари врз основа на сегашните резултати, според лица запознаени со ова прашање, што е приближно двојно повеќе од стапката на приходи на крајот на 2025 година и ги зајакнува плановите на компанијата за излегување на Волстрит.

Приходите на производителот на Чет ГПТ (ChatGPT) се забрзаа во последните месеци, делумно поттикнати од растот на неговиот софтвер за програмирање со ВИ, изјавија лицата, кои побараа да останат анонимни бидејќи информациите не се јавни. Растот, исто така, го одразува замавот од продажбата на претплати и неговиот бизнис со рекламирање, кој е во почетна фаза. Продолжува да расте и неговиот основен бизнис со потрошувачи.

„Опен еј-ај“ одби да коментира.

„Опен еј-ај“ води жестока битка со долгогодишниот ривал „Антропик“ (Anthropic PBC) за привлекување повеќе деловни клиенти. Двете компании поднесоа доверлива документација за излегување на берза, при што се очекува „Антропик“ да спроведе ИПО уште оваа есен, пред „Опен еј-ај“.

„Антропик“, кој некогаш се сметаше за аутсајдер, доби на сила со алатките за ВИ што ги поедноставуваат сложените задачи, вклучително и програмирањето. „Антропик“ во мај соопшти дека неговата годишна стапка на приходи надминала 47 милијарди долари, иако двете компании можеби не ја мерат на ист начин. Годишната стапка на приходи на една компанија ги проектира приходите за цела година врз основа на пократок период.

Во четвртокот, „Опен еј-ај“ го именуваше својот втор нов директор за приходи за помалку од една година, ангажирајќи директор од областа на сајбер-безбедноста за да помогне во забрзувањето на растот на продажбата.

Како дел од интерното соопштение за вработувањето, коосновачот и претседател на „Опен еј-ај“, Грег Брокман, рече дека годишната стапка на приходи на компанијата во јули се зголемила за повеќе од 20 отсто во однос на претходниот месец.

Сара Фриер, финансиската директорка на „Опен еј-ај“, претходно изјави дека компанијата ја завршила минатата година со повеќе од 20 милијарди долари годишни приходи.

„Опен еј-ај“ во последните недели бележи нагло зголемување на побарувачката за своите ВИ-агенти, вклучувајќи го Кодекс (Codex) за програмирање и ЧетГПТ Ворк (ChatGPT Work) за поширок спектар задачи. Компанијата, исто така, ги намали цените на одредени модели за подобро да се натпреварува за клиентите чувствителни на трошоците со „Антропик“ и долгата листа кинески ривали.