„Муншот“ достигна вредност од 50 милијарди долари и размислува за ИПО на почетокот на 2027

„Муншот“ (Moonshot AI) го заврши последниот круг на прибирање приватен капитал со проценета вредност од околу 50 милијарди долари и се движи кон иницијална јавна понуда во Хонгконг во првиот квартал од следната година, според лица запознаени со темата.

Кинескиот лидер во вештачката интелигенција почна и со подготовките за испитување на расположението на инвеститорите преку прелиминарни состаноци што би можеле да почнат уште овој месец, рекоа некои од изворите, кои побараа да останат анонимни.

„Муншот“ е една од најголемите ѕвезди на кинеската сцена на ВИ, која во јули се проби на глобалната сцена со претставувањето на Кими К3, отворен модел што според некои показатели е речиси рамноправен со водечките платформи на компании како „Опен ej-ај“ (OpenAI) и „Антропик“ (Anthropic). Неговата планирана ИПО е една од најочекуваните трансакции во Хонгконг, каде што прибирањето капитал поттикнато од индустријата поставува нови рекорди. Компанијата размислува да прибере до пет милијарди долари преку трансакцијата, изјавија претходно лица запознаени со темата.

Нејасно е како врз проценетата вредност или рокот за ИПО може да влијае построгиот надзор на кинеската индустрија на ВИ, откако регулаторите отворија истрага за безбедноста на податоците во „Дипсик“ (DeepSeek) и „Муншот“, наведува „Информејшн“ (The Information), што ги засилува пошироките загрижености за управувањето и безбедноста.

Разгледувањата се во тек и времето на ИПО сè уште може да се промени, рекоа изворите. Претставниците на „Муншот“ не одговорија на барањата за коментар.

Проценетата вредност на компанијата постојано растеше низ низа кругови на прибирање капитал. Во претходниот круг летово таа беше проценета на 31,5 милијарди долари. Редовните приходи на „Муншот“ на годишно ниво, показател за идната продажба, се очекува да се зголемат од сегашната една милијарда на две милијарди долари до декември. Компанијата достигна 300 милиони долари годишни повторливи приходи во јуни, претходно објави „Блумберг њуз“ (Bloomberg News).

Според изворите, лабораторијата за ВИ со седиште во Пекинг претходно ја вклучи „Банката на Америка“ (Bank of America Corp.) како главен координатор на трансакцијата, покрај банките спонзори „Кинеската меѓународна капитална корпорација“ (China International Capital Corp.), „Дојче банк“ (Deutsche Bank AG) и „Голдман Сакс“ (Goldman Sachs Group Inc.). Компанијата поднела доверлива пријава за ИПО, рекоа тие.

Основан на почетокот на 2023 година од Јанг Џилин, поранешен професор на Универзитетот Цингхуа, кој претходно работел во „Мета“ (Meta Platforms Inc.) и во „Гугл“ (Google) на „Алфабет“ (Alphabet Inc.), „Муншот“ ги има меѓу своите инвеститори „Алибаба“ (Alibaba Group Holding Ltd.), „Тенсент“ (Tencent Holdings Ltd.) и „5Ј капитал“ (5Y Capital).