text size
Банките од Волстрит почнаа да купуваат и продаваат дел од пакетот за финансирање во вредност од 35 милијарди долари, наменет за проширување на инфраструктурата за вештачка интелигенција на „Бродком“ (Broadcom Inc.) и „Антропик“ (Anthropic PBC), при што најголемата зделка за приватен кредит досега сега се нуди на поширок круг инвеститори.
Банки, меѓу кои „Банката на Америка“ (Bank of America Corp.) и „Морган Стенли“ (Morgan Stanley), во изминатата недела тргуваат со делови од долгот, велат лица запознаени со случајот, кои побарале да останат анонимни бидејќи не се овластени јавно да зборуваат. Овие банки беа меѓу заедничките агенти за пласирање на транша од 24 милијарди долари од вкупниот пакет долг.
Претставниците на „Банката на Америка“ и „Морган Стенли“ одбија да дадат коментар.
„Аполо глобал менаџмент“ (Apollo Global Management Inc.) исто така го нуди долгот на институционални инвеститори, изјавија други извори кои исто така побарале анонимност. Компанијата го организираше пакетот за финансирање од 35 милијарди долари за заемопримачот, во соработка со „Блекстоун“ (Blackstone Inc.). Заемопримачот е компанија за посебна намена која купува специјализирани чипови развиени од „Гугл“ (Google) и „Бродком“, а потоа ги издава под закуп на „Антропик“. Претставниците на „Аполо“ и „Блекстоун“ одбија да дадат коментар.
Обврзниците се нудат по цена од околу 100 до 100,5 центи за долар, според дел од банкарските котации за тргување во кои имал увид Блумберг.
Овој договор покажува дека финансирањето на изградбата на инфраструктура за вештачка интелигенција се одвива и преку јавните и преку приватните кредитни пазари, односно преку комбинација од двата, бидејќи капиталните инвестиции не покажуваат знаци на забавување, а технолошките компании се натпреваруваат во проширувањето на своето присуство во областа на ВИ.
Трансакцијата користи модел на одложено повлекување средства, при што заемопримачот може да ги повлекува обезбедените средства кога ќе му бидат потребни, преку околу 16 одделни исплати во период подолг од една година, како што чиповите стануваат достапни.
Откако ќе бидат повлечени поединечни делови од долгот, со нив може да се тргува на пазарот 144А, каде што квалификувани инвеститори, вклучително и осигурителни компании и инвестициски фондови, можат да купуваат и продаваат должнички хартии од вредност, како што претходно изјавија изворите.
„Аполо“ ја започна својата платформа за тргување кон крајот на 2024 година и ангажира кадар од банките на Волстрит за да го засили овој бизнис. До крајот на првиот квартал компанијата истргува приватни средства во вредност од 15 милијарди долари.
.webp){kind=icon}
