Брзиот пад на неделната продажба на Ајфон во Кина може да претставува голем предизвик за компанијата „Епл“ (Apple Inc), чиј паметен телефон главно беше отпорен на светската економска криза, проценува аналитичката компанија „Џеферис“ (Jefferies).
Продажбата на Ајфон преку калифорниската компанија „Купертино“ (Cupertinо) во Кина минатата недела падна дури за 27 проценти и претставува трет последователен остар неделен пад. Дури и ако се земе предвид нивното претходно работење оваа година, ќе се забележи дека негативниот тренд продолжува и е полош од неодамнешните падови на конкурентите кои користат оперативен систем Андроид, напишаа аналитичарите на „Џеферис“.
Во третото тримесечје продажбата на Ајфон во Кина порасна за 5,7 отсто, додека алтернативите со оперативен систем Андроид забележаа пад на продажбата од 15,2 проценти, напиша Едисон Ли, еден од аналитичарите на „Џеферис“. Тоа се промени во месецов што изминува и „Епл“ загуби можеби четири-пет проценти од пазарниот удел во Кина, проценуваат аналитичарите.
„Иако Ајфон претходно беше светла точка, сега светлината се намалува и неодамнешните податоци укажуваат на ризик дека потенцијално би можело да стане најлоша точка“, напиша аналитичарот Ли, според кого ова претставува посебна грижа за синџирот на снабдување на компанијата.
Светскиот пазар на паметни телефони забележа пад на испораките во сите три тримесечја годинава, проценува компанијата за истражувања на пазарот „Каналис“ (Canalys). Потрошувачките апетити за електронските производи се влошија со зголемувањето на каматните стапки и растечките цени на енергијата. Во Кина, пак, економското забавување и негативните влијанија од ковид-19 дополнително ја ослабуваат продажбата.
Кинеските потрошувачи веќе купија помалку Ајфони 14 во првите денови од неговото лансирање на пазарот во септември споредено со неговиот претходник лани. А испораките на паметните телефони во Кина паднаа за околу 21 отсто во август, покажуваат податоците објавени пред една недела од националното статистичко биро.
„Епл“ се откажа и од плановите за зголемување на производството на Ајфон 14, извести „Блумберг“ минатиот месец.
.webp){kind=icon}
