.webp){kind=icon}
„Тесла“ повлекува речиси 81.000 електрични автомобили во Кина поради проблеми со софтверот и со безбедносните појаси. Тоа е повеќе отколку што обично испорачува од својата фабрика во Шангај во кој било месец.
Државната управа за регулација на пазарот во Кина денеска информира дека се повлекуваат 70.434 увезени возила од американскиот производител на електрични возила, како и уште 10.127 возила произведени во Кина.
Моделите „ес“ и „екс“ бараат безжично поправање на софтверот за решавање на проблемот во системот за управување со батеријата на автомобилот, што може да доведе до губење на силата, додека моделот „3“ има неисправен безбедносен појас.
„Тесла“ ги повика сите засегнати сопственици на моделот „3“ да ги вратат своите автомобили на преглед и одржување доколку е потребно, истовремено повикувајќи ги возачите да бидат внимателни на улица.
Американскиот производител на електрични возила поминува преку некаков вид тешкотии во Кина, најголемиот светски пазар на автомобили, со реализирани испораки во октомври од 71.704 електрични возила, што е помалку од рекордните септемвриски 83.135 возила. Тоа резултира со намалување на цената од страна на производителот на автомобили, за да ја зголеми побарувачката.
„Тесла“ го менува и својот маркетиншки пристап во Кина, бидејќи острата конкуренција на домашниот ривал БЈД (BYD Co.) и неизедначената продажба ги загрозуваат нејзините планови за раст на најголемиот пазар на електрични автомобили во светот.
Иако „Тесла“ неодамна ја прошири својата фабрика во Шангај, за да го удвои капацитетот на производство на околу милион автомобили годишно, времето на чекање за автомобилите веќе драстично се намали, што претставува знак дека компанијата се бори да ја зголеми продажбата и да ги задоволи амбициите.
Компанијата на Илон Маск страда и од разни контроверзии околу безбедноста на производите во Кина по неодамнешната несреќа на југоистокот од земјата, во која загинаа две лица.
Денешното повлекување електрични возила на „Тесла“ во Кина не се случува првпат. Во јуни минатата година „Тесла“ мораше да направи софтверски поправки на повеќе од 285.000 возила за да го реши безбедносниот проблем што го идентификува државниот регулатор.
Кина е најважниот пазар за „Тесла“ по САД. Моделите „ипсилон“ и „3с“ се произведуваат во фабрика во предградието на Шангај и се испорачуваат на локалниот пазар, а се извезуваат и во другите делови од Азија и Европа.
