Илон Маск продаде удел во „Тесла“ вреден 3,6 милијарди долари

Илон Маск, кој неделава го загуби првото место на листата на „Блумберг“ за најбогати луѓе во светот, по четврти пат годинава продаде акции од „Тесла“ (Tesla Inc).

Главниот извршен директор на производителот на електрични автомобили продаде речиси 22 милиони акции на компанијата за 3,58 милијарди долари, се наведува во поднесокот од доцна во средата. Трансакциите се реализирани помеѓу 12 и 14 декември.

Акциите на „Тесла“ годинава паднаа за 55 отсто, бидејќи инвеститорите се загрижени за купувањето на „Твитер“ (Twitter) од страна на Маск за 44 милијарди долари. Таа загриженост е дополнета со зголемените каматни стапки, кои ги прават автомобилите поскапи за потрошувачите, и со проблемите со побарувачката во Кина, вториот најголем пазар на „Тесла“ по САД.

Во текот на викендот Маск, кој посакува да ја зајакне активноста на социјалната мрежа што сега ја поседува, го нападна поранешниот извршен директор на „Твитер“ пишувајќи за теории на заговор, што ги вознемири дури и неговите најверни обожаватели.

Маск со месеци се обидуваше да се повлече од договорот за купување на „Твитер“, но не успеа. За да собере доволно пари и да го реализира купувањето, тој продаде акции на „Тесла“ вредни повеќе од 15 милијарди долари - околу 8,5 милијарди долари во април, а потоа уште 6,9 милијарди долари во август. Во ноември, откако вети дека завршил со продажбата, тој продаде удел од уште 3,95 милијарди долари.

„Твитер“ има нови високи сметки што мора да ги плати.

Маск искористи значителна сума позајмени пари, кои сега се наоѓаат на билансот на состојба на „Твитер“, за да помогне во финансирањето на купувањето. Долгот на „Твитер“ скокна на околу 13 милијарди долари, од 1,7 милијарда долари пред договорот, заедно со други видови обврзници што може да се претворат во акции.

„Твитер“ сега се соочува со годишни камати што се приближуваат до 1,2 милијарда долари - што може да стане уште поскапо, со оглед на тоа што каматата на околу половина од тој долг не е фиксна и ќе расте со пазарот.

„Ризикувам да кажам нешто очигледно, внимавајте на долгот во турбулентни макроекономски услови, особено кога ФЕД продолжува да ги зголемува стапките“, напиша Маск оваа недела на Твитер.

Неодамнешната продажба на Маск го намали неговиот удел во компанијата на приближно 13 проценти, според податоците на „Блумберг“. Маск, кој е извршен директор на „Тесла“ од 2008 година, останува најголемиот акционер. На затворањето на тргувањето во средата, неговото богатство вредеше 160,9 милијарди долари, ставајќи го на второто место на индексот на милијардери на „Блумберг“, зад Французинот Бернар Арно. Неговото богатство оваа година падна за 109,4 милијарди долари.

Во моментов нема коментари за веста. Биди прв да коментира...

Остави коментар