„Макпетрол“ веќе нема да увезува и да испорачува гас до своите потрошувачи, почнувајќи од 1 јануари 2023 година.
Компанијата денеска извести дека причина за ова се „новите услови на работа што ги предвидува прерано потпишаниот Договор за интерконекција помеѓу државното претпријатие ГА-МА АД и ’Булгартрансгас’ од Р Бугарија, поради кој досегашните услови според кои ’Макпетрол’ АД увезува и испорачува природен гас до своите потрошувачи не се применливи“.
Одлуката на „Макпетрол“ да престане со трговија со гас ги става под ризик централното греење во Скопје, работата на фабриките во зоните и уште неколку големи фабрики што работат на гас.
„Го изгубивме и единствениот канал за пренос на гас што го имавме. Иако имаше најави дека државата ќе најде начин да обезбеди гас по други канали, тоа досега не се случи, а сега и овој е затворен“, велат од „Макпетрол“ за „Блумберг Адрија“.
Како опција за греење за скопјани сега останува мазутот, но, според правилата, поради големото загадување што го продуцира, топланите смеат да работат на овој енергент најмногу десет дена. Опцијата за работа на дизел отпаѓа, затоа што топланите немаат лиценца за тоа.
Во изјава за „Блумберг Адрија“ од „Макпетрол“ велат дека, според новиот договор што го потпиша ГА-МА, наместо од точката кај Крива Паланка, гасот ќе треба да се презема од бугарско-турската граница и наместо во нормални кубни метри како досега, ќе се мери во киловат-часови. Ова за компанијата е неприфатливо, затоа што ќе треба да набавува прецизни количества по однапред утврдени цени. Тие количества „Макпетрол“ ќе мора да ги потроши, а ако има потреба од уште – нема да може да набави.
„На пример, имавме ситуација пред некој ден кога токму ЕСМ ја надмина квотата за 68 отсто. Што ќе правиме во таква ситуација, од каде ќе набавуваме? Другиот проблем е што ако не се искористи целото количество, досега тоа се префрлаше за нареден месец, сега тоа не е можно“, вели нашиот извор, кој е вклучен во преговорите околу ова прашање.
Дополнителен проблем, според соопштението што го лиферуваше компанијата, е тоа што „до овој момент не се донесени подзаконските акти во согласност со Законот за енергетика, кои ќе го регулираат работењето на пазарот на природен гас во согласност со договорот за интерконекција, „Макпетрол“ АД Скопје нема можност да почне со новите услови на работа предвидени со новиот договор за интерконекција. Дополнителен проблем претставува и фактот што и по пет години од донесувањето на Законот за енергетика сè уште нема сертифициран оператор на системот за пренос на природен гас, кој е должен да ги донесе потребните подзаконски акти“, стои во дописот до медиумите.
Токму поради ова, од „Макпетрол“, во согласност со Договорот за интерконекција, побарале од државната компанија ГА-МА да обезбеди согласност од „Булгартрансгас“ да продолжи со работа според старите услови, заклучно со 30 септември 2023 година, период во кој би се донеле сите подзаконски акти и сите учесници на пазарот на природен гас би се подготвиле за новиот начин на работа, кој е многу посложен од досегашниот. Во согласност со членот 24 од договорот, ова е можно, но нема да се спроведе. На преговарачите од „Макпетрол“ им било кажано дека барање до „Булгартрансгас“ било доставено, но немало одговор.
Денеска во ГА-МА велат дека утре ќе одговорат на дописот на „Макпетрол“.
„’Макпетрол’ АД Скопје ги информираше сите релевантни институции во државата за неподготвеноста на целиот пазар на природен гас за примена на Договорот за интерконекција уште пред неговото потпишување. Во однос на горенаведеното, ’Макпетрол’ АД потенцира дека потпишување таков договор е избрзана одлука, на која задолжително треба да претходи донесување на сите подзаконски акти, како и подготовка на сите учесници на пазарот на природен гас за новите услови на работење, но истото тоа не беше земено предвид. ’Макпетрол’ АД Скопје изразува жалење за оваа несакана ситуација и ќе направи сè што е во негова моќ за да може да се надмине истата таа што поскоро“, соопшти компанијата.
.webp){kind=icon}
