.webp){kind=icon}
„Рено“ (Renault SA) му нуди одредени отстапки на „Нисан“ (Nissan Motor Co.), бидејќи се обидува да склучи договор за рестартирање на повеќе од дведеценискиот сојуз, велат лица запознаени со ситуацијата. Независните директори на одборот на „Нисан“ треба да се состанат во почетокот на следната недела за да разгледаат неколку предлози од „Рено“, рекоа лица што побараа да не бидат идентификувани бидејќи разговорите се приватни.
Тие вклучуваат уверување за да се ублажи загриженоста на „Нисан“ околу заедничката интелектуална сопственост, една од спорните точки во преговорите, велат изворите. „Рено“ исто така признава дека „Нисан“ може да инвестира помалку отколку што се надеваше во бизнисот за електрични возила на францускиот производител на автомобили, велат изворите.
„Рено“ гледа потенцијал за околу 10 милијарди евра вредност на единицата и планира иницијална јавна понуда за вториот дел од годината во зависност од условите на пазарот. „Нисан“ не се согласува со ова ниво на вреднување и сè уште не носи одлука за електричните автомобили, велат изворите и потенцираат дека работата на крајот може да се заврши со купување помалку од првично планираниот удел од 15 отсто.
Портпаролот на „Рено“ одби да коментира. Претставниците на медиумите за „Нисан“ со седиште во Јапонија не одговорија веднаш на прашањата за коментар, надвор од работното време.
Иако „Рено“ ги прави последните напори да го постигне договорот, отстапките и натаму се минорни, а главниот фокус на производителот на автомобили сè уште е спроведувањето на неговиот стратегиски план и профитабилноста. Тие напори се исплатат бидејќи акциите пораснаа речиси за 75 отсто откако го достигнаа најниското ниво на 8 март, кога „Рено“ беше под притисок поради рускиот бизнис што повеќе не го поседува.
Спојување со „Нисан“
Притисокот од минатото за спојување од страна на француската влада, која е најмоќен инвеститор на „Рено“ со удел од 15 отсто, е една од причините поради кои односите меѓу двете компании станаа напнати низ годините. Ребалансот ќе значи дека „Рено“ со текот на време ќе продаде 28 отсто од уделот на „Нисан“, така што секој од нив ќе заврши со еднакви удели во другата компанијата од по 15 проценти.
Како дел од предлозите што моментално се дискутираат, „Нисан“ нема да дозволи споделување на својата хибридна технологија е-пауер. Се очекува претседателот на „Рено“, Жан-Доминик Сенар, и главниот извршен директор Лука де Мео лично да присуствуваат на следниот состанок на оперативниот одбор на Алијансата во Јапонија на крајот на месецот, велат изворите. Сè уште не се донесени одлуки за тоа кога може да се потпише евентуален необврзувачки договор, а планирањето на различните состаноци сè уште може да се промени, велат изворите.
