Корпорацијата „Мајкрософт“ (Microsoft Corp) вчера потпиша документација за ветување дека ќе испорачува игри како „Кол оф дјути“ (Call of Duty) на платформите на „Нинтендо“ (Nintendo Co) во текот на една деценија. Тоа е потег дизајниран да ги намали стравувањата на регулаторите за предложеното преземање на „Активижн бизард“ (Activision Blizzard Inc).
„И двете фирми преговараа и потпишаа обврзувачки 10-годишен правен договор за ’Кол оф дјути’ на ’Активижн“, кој ќе биде објавен за играчите на ’Нинтендо’ истиот ден и со истите карактеристики како неговата верзија на ’Иксбокс’ (Xbox)“, напиша во твит претседателот на „Мајкрософт“, Бред Смит.
Компанијата „Мајкрософт“ се бори да ги убеди регулаторите и скептичните играчи во индустријата за игри во нивната добра намера во обидот за преземање на „Активижн“. Ривалот „Сони“ (Sony Group Corp) за производство на конзоли се спротивстави, велејќи дека „Мајкрософт“ на крајот ќе ги претвори „Кол оф дјути“ и другите наслови во портфолиото на „Активижн“ во ексклузиви за својата конзола „Иксбокс“ и услугата за претплата.
„Кол оф дјути“ е постојано на врвот на продажните топ листи, а нејзиното последно издание го зазеде првото место во САД од лансирањето во ноември, смета пазарниот проценител НПД (NPD).
За „Нинтендо“, кој е познат по производството на содржини ориентирани кон семејството, како што е симулатор за правење домови, „Анимал кросинг“ (Animal Crossing) или цртаниот пејнтбол-стрелец „Сплатун“ (Splatoon), „Кол оф дјути“ е наслов со невообичаена тема за возрасни. Но проширувањето во други жанрови ќе му помогне на производителот на игри со седиште во Кјото да ги задржи играчите на сопствените платформи и да ги спречи да бараат забава на друго место, сметаат аналитичарите.
„Мора да имаме на ум дека децата растат и задржувањето на клиентите е секогаш поевтино од стекнувањето нови клиенти. Може да останат соодветен бренд за семејството дури и со содржина што не е строго ориентирана кон децата. 'Епл' (Apple) беше многу успешен во тоа со 'Епл ТВ+' (Apple TV+). Станува збор за постигнување рамнотежа, но и за вредности, родителска контрола и приватност“, рече Каролина Миланези, главна аналитичарка во „Криејтив стратеџис“ (Creative Strategies).
Портпаролот на „Нинтендо“ го потврди договорот со „Мајкрософт“, но одби да коментира повеќе. „Мајкрософт“ му го понуди истиот 10-годишен договор со истите услови и на „Сони“, но производителот на „Плејстејшн“ (PlayStation) засега одбива.
.webp){kind=icon}
