„Нетфликс“ во иднина ќе прави помалку филмови

„Нетфликс“ (Netflix Inc.) го реструктурира својот филмски оддел за да снима помалку филмови секоја година и да го централизира донесувањето одлуки, соопшти компанијата во четвртокот.

„Нетфликс“ ќе ги комбинира единиците што произведуваат мали и средни филмови, што ќе доведе до неколку отпуштања и заминување на двајца од неговите најискусни директори. Лиса Нишимура, која на стриминг-платформата воведе стендап-комедија и оригинални документарни филмови, заминува по повеќе од 15 години во компанијата. Моментално е одговорна за документарни и нискобуџетни филмови.

Ијан Брик, потпретседател на филмската група, исто така заминува по повеќе од една деценија. Брик помогна во создавањето на франшизата „Кисинг бут“ (Kissing Booth) и соработуваше со филмаџии како Никол Холофсенер и браќата Дуплас.

 
Шефот за филм Скот Стубер се обидува да ја намали продукцијата на компанијата со цел повеќе наслови да бидат со висок квалитет. Платформата неодамна објави повеќе оригинални филмови од која било друга компанија во Холивуд, продуцирајќи повеќе од 50 годишно.

Неколку од нив добија „оскар“, како „На запад ништо ново“, кој годинава ја доби наградата за најдобар странски филм, или ги гледаат десетици милиони луѓе, како „Глас онион“ (Glass Onion). Но многу од нив доаѓаат и си одат со малку помпа.

Компанијата во изминатите години додаде персонал за да го зголеми производството, создавајќи повеќе одделенија одговорни за филмови по различни цени. Групата за независни филмови прави наслови со помал буџет (обично 30 милиони долари или помалку), додека друга група снима филмови со среден буџет (меѓу 30 милиони долари и 80 милиони долари). Трета единица прави филмови со поголем буџет.

Малку филмови на „Нетфликс“ добиваат „оскари“, а повеќето минуваат без многу помпа Depositphotos

Овие различни дивизии функционираа со релативна автономија, во согласност со културата на „Нетфликс“ за децентрализирано одлучување. Раководните лица честопати имаа моќ да се согласат да снимат филм без да се консултираат со своите претпоставени. Стубер сега централизира повеќе одлуки и се обидува да натера повеќе од неговите менаџери да соработуваат.

„Им благодариме на двајцата за нивниот придонес од нас да направиме филмско студио од светска класа и им посакуваме сè најдобро во иднина“, рече Стубер за заминувањето на двајцата директори. Тој ја пофали Нишимура „како шампион за инклузија на екранот и надвор од него“, истакнувајќи дека таа му се придружила на „Нетфликс“ кога сè уште првенствено бил услуга за ДВД по пошта. Тој му се заблагодари и на Брик за неговата работа на иницијативата за нови филмски работници.

Отпуштањата се многу помали од оние што „Нетфликс“ ги објави пред една година. Компанијата, која ја заврши 2022 година со околу 12.800 вработени, елиминира стотици позиции минатата година во обид да ги намали трошоците откако растот на претплатниците забави.

Седиштето на „Нетфликс“ Bloomberg

Намалувањето на бројот на вработени на „Нетфликс“ ја навести годината на кратење на работни места кај многу конкуренти од сферата на филмот и телевизијата, кои ги намалуваат трошоците како одговор на губењето на традиционалните ТВ-гледачи и притисокот од инвеститорите да ја подобрат профитабилноста. „Волт Дизни“ неделава започна процес на укинување на 7.000 работни места.

Бидејќи пронаоѓањето нови клиенти стана потешко, „Нетфликс“ воведе пакет за стриминг со реклами по пониска цена за да ги зголеми приходите и да привлече гледачи што внимаваат на буџетот. Платформата ја заврши 2022 година со речиси 231 милион клиенти што плаќаат. Исто така воведува програма што ги принудува луѓето што користат туѓ налог на „Нетфликс“ да платат за услугата.