Новата стратегија на „Нетфликс“ им се допадна на инвеститорите

Деловниот маневар на „Нетфликс“ (Netflix) ги освојува инвеститорите, кои една од акциите со најлоши перформанси на почетокот на годината ја претворија во една од најдобрите во втората половина од 2022 година.

Катализатор за ваквото враќање беше воведувањето пониска цена за претплатниците на кои не им пречи да гледаат филмови и серии со пауза за реклами. Овој потег се очекува да ѝ помогне на компанијата со седиште во Лос Гатос, Калифорнија, да привлече нови и да ги задржи постојните клиенти.

Новиот стратегиски план на компанијата доаѓа во време кога високото ниво на инфлација го еродира расположливиот приход на домаќинствата, а услугите за стриминг изгледаат како луксуз што потрошувачите би можеле најпрво да го отфрлат во обид да заштедат пари.

„Нетфликс“, кој доби милиони нови корисници за време на пандемијата, а особено за време на заклучувањето во 2020-та, годинава почна да губи претплатници. Откако го шокира Волстрит со двата последователни извештаја за заработката, компанијата вети дека ќе преземе драстични чекори за да го трансформира својот бизнис, како што се сузбивање на споделувањето лозинки и лансирање поевтини претплати со вклучени реклами.

Цената на акциите на компанијата падна за 72 отсто од почетокот на годината, сè до мај, што е најголем пад на индексот Nasdaq 100 во тој период. Оттогаш, вредноста се зголеми за 84 отсто, што е трета најголема добивка за акциите од Nasdaq.

Bloomberg Chartmaker

Годинешните проблеми во стриминг-индустријата погодија и еден од главните конкуренти на „Нетфликс“, „Волт Дизни“, кој во август објави дека ќе ја зголеми цената на својот водечки сервис „Дизни плус“ (Disney+) за 38 отсто, на 11 долари месечно, а исто така ќе воведе пакет со вклучени реклами. И „Нетфликс“ ја зголеми цената на својата стандардна понуда без реклами, покачувајќи ја за околу 11 отсто во јануари, на 15,49 долари месечно во САД, подоцна појаснувајќи дека зголемувањето се должи на загубата на претплатници.

„Нетфликс“ во изминатата деценија тргуваше со просечна заработка поголема за околу 79 пати, бидејќи изгради култ околу сериите како што се „Тајгер кинг“ („Tiger King“) и „Почудни нешта“ („Stranger Things“). Иако сè уште не е евтин во никој случај, сега се проценува на околу 27 пати.

Пред околу една година компанијата достигна рекордна пазарна вредност од 306 милијарди долари. И покрај неодамнешниот пораст, акциите годинава сè уште се во пад од 49 проценти, односно се проценуваат на околу 136 милијарди долари. Се чини дека планот на компанијата за деловен маневар освои и некои аналитичари. Акциите сега имаат 22 препораки за купување, 24 воздржувања и четири продажби, според податоците на „Блумберг“. Тоа се подобрени податоци во споредба со 16 купувања, 29 воздржувања и седум продажби од 30 јуни.

„'Нетфликс' успеа да создаде поинакво искуство на гледање, кое пречи помалку отколку што очекувавме и мислиме дека оваа понуда треба да го привлече вниманието на потрошувачите“, посочи Марк Махани, аналитичар во „Еверкор“ (Evercore).

Махани, еден од аналитичарите што ги наградија акциите на „Нетфликс“ во последниве месеци, рече дека останува уверен во својата првична прогноза оти основниот план со реклами може да генерира 10 милиони нови претплатници и од 1 до 2 милијарди долари дополнителни приходи за „Нетфликс“ до 2024 година.

Во моментов нема коментари за веста. Биди прв да коментира...

Остави коментар