.webp){kind=icon}
Производителите на автомобили очекуваат посилна продажба на нови автомобили во САД бидејќи резервите на трговците се дополнуваат со поголем обем на производство, но тие придобивки се придушени од високите цени и зголемените финансиски трошоци.
Продажбата на нови автомобили минатиот месец веројатно пораснала за дури 7,3 проценти, според прогнозата на „ЏД Пауер“ (J.D. Power) и ЛМЦ (LMC Automotive).
„Хонда“ (Honda Motor Co) и „Хјундаи“ (Hyundai Motor Co) забележаа добивки и во март и во првото тримесечје годинава. Другите големи производители на автомобили, вклучувајќи ги и „Џенерал моторс“ (General Motors Co), „Тојота“ (Toyota Motor Corp), „Форд“ (Ford Motor Co) и „Тесла“ (Tesla Inc), се очекува деновиве да ги објават податоците за продажбата во САД во последниот квартал.
Според „Кокс“ (Cox), недостигот од полупроводници што во последниве години ги испразни резервите на трговците исчезнува бидејќи резервите се зголемија за 70 проценти споредено со ова време минатата година. Автомобилите сега седат на дилерските места во просек 34 дена пред да бидат продадени. Тоа е повеќе од пред една година, кога просекот беше 24 дена, покажуваат податоците на автомобилскиот истражувач „Едмундс“ (Edmunds.com).
Со просечни цени на нови автомобили од речиси 50.000 долари, „Едмундс“ очекува дека продажбата овој квартал ќе се намали за 1,8 отсто во споредба со четвртиот квартал од 2022 година. Трговците се плашат од зголемувањето на каматните стапки, кои се јавија како нова закана по недостигот од резерви и економијата како главни проблеми.
Отплатата на автомобилски кредити сега во просек изнесува 784 долари месечно, што е за околу 177 долари повеќе од март 2020 година, кога започна пандемијата. Годишната стапка на продажба се очекува да се зголеми на 14,4 милиони во март, што е повеќе од 13,5 милиони, колку што беше пред една година.
Но тоа е сè уште ниско според историските стандарди. Пред пандемијата годишната продажба на автомобили во САД надминуваше 17 милиони пет последователни години.
Жешки хибриди на „Хонда“
„Хонда“ соопшти дека продажбата во САД во првиот квартал се зголемила за 6,8 проценти, вклучувајќи и 8 отсто раст реализиран во март. Растот го предводеше најпродаваниот компактен „SUV CR-V“, а следуваше големата побарувачка за неговите цврсти компактни седани со средна големина, „сивик“ (Civic) и „акорд“ (Accord). Јапонскиот производител на автомобили рече дека продажбата во март била најдобра од јули 2021 година и дека поставиле рекорди за продажба на хибридно-електричните верзии на „акорд“ и „CR-V“.
Силен почеток на „Хјундаи“
„Хјундаи“ забележа раст на продажбата од 16 проценти во првиот квартал, продавајќи рекордни 184.449 возила. Март беше силен месец за корејскиот производител на автомобили бидејќи забележа пораст од дури 27 отсто, што претставува негов петти последователен месечен рекорд на продажбата. Најпродавани во овој квартал беа компактниот теренец „тусон“ (Tucson), теренецот со средна големина „санта фе“ (Santa Fe) и компактниот седан „елантра“ (Elantra). Моделите што штедат гориво исто така привлекоа купувачи со значително голема побарувачка за хибридно-електрични верзии на сите три модели.
