„Тесла“ поскапува дел од возилата откако пред два дена поевтини други модели

„Тесла“ (Tesla Inc) ги зголеми цените на своите возила од моделите ес и икс (Model S, Model X) во САД по големите поевтинувања од почетокот на оваа година, што влијаеше врз профитабилноста и акциите на производителот на автомобили.

„Тесла“ ја поскапе секоја варијанта на своите модели од високата класа за 2.500 долари, зголемувајќи ја цената на седанот и спортското теренско возило за два-три процента, според објавените информации на интернет-страницата на компанијата.

Моделите ес и икс сега почнуваат со цени од 87.490 долари, односно 97.490 долари. И покрај ова поскапување, возилата сè уште се поевтини отколку што беа на крајот на првиот квартал, кога намалувањата на цените од линијата на „Тесла“ ги притиснаа профитните маржи.

Приспособувањата доаѓаат само два дена откако „Тесла“ по вторпат овој месец ги намали цените на својот теренец, моделот ипсилон (Model Y), како и на седанот модел 3 (Model 3).

Bloomberg Mercury

 

Акциите на „Тесла“ вчера паднаа за 9,7 проценти, што е нивен најголем пад од 3 јануари, кога главниот извршен директор Илон Маск сугерираше дека компанијата ќе продолжи да ги намалува цените за да ја поттикне побарувачката. Утрово со акциите се тргуваше по 1,8 отсто повисока цена.

„Зазедовме став дека притисокот за поголеми количества и поголема флота е вистинскиот избор во однос на помал обем, а поголема маржа“, им рече Маск на аналитичарите доцна во средата.

Компанијата продаде само 10.695 возила од моделите ес и икс во првиот квартал, што претставува само околу 2,5 проценти од вкупниот број испораки. Иако Маск рече дека двете возила се од помало значење за иднината на „Тесла“, компанијата неодамна почна повторно да ги извезува од својата фабрика за автомобили во Калифорнија.

Bloomberg Mercury

 

Бруто-маржата на „Тесла“ падна на 19 проценти во првиот квартал, што е под прагот од 20 отсто, на кој компанијата очекува да остане оваа година. Компанијата останува пред другите производители на автомобили во однос на поврат од продажба. Имено, во 2022 година „Џенерал моторс“ (General Motors Co) објави оперативна маржа од 6,6 проценти, додека „Форд“ (Ford Motor Co) имаше маржа од четири проценти.

Неколку часа пред објавувањето на покачувањето на цените, извршниот директор на „Форд“, Џим Фарли, рече дека „Тесла“ може да започне ценовна војна.

„Потезите на 'Тесла' за зајакнување на растот се целосно рационални и не треба никого да изненадат. Војните на цените избувнуваат насекаде“, рече Фарли на хуманитарен настан во Детроит.

Уникатната позиција на „Тесла“ меѓу производителите на електрични возила предизвика споредба со раните денови на „Форд“, кога иновацијата на таа компанија од почетокот на 1900-тите години, подвижната лента за склопување, ги исфрли другите производители на автомобили од игра со намалувањето на трошоците што другите компании не можеа да ги остварат.

Маск во средата рече дека „Тесла“ не сака да ги исфрли конкурентите од бизнисот, туку да ги направи своите автомобили попристапни во услови на зголемени каматни стапки и тврдоглава инфлација.