text size
„Тојота“ (Toyota Motor Corp) ја зацврсти својата позиција на врвот на светските автомобилски гиганти, произведувајќи рекордни 10,7 милиони автомобили во годината што заврши на 31 март. Ваквиот исход е резултат на зголемениот капацитет и оптимизацијата на производството на компанијата во Северна Америка и Азија.
Глобалната продажба, која ги вклучува и „Дајхатсу“ (Daihatsu Motor Co) и „Хино“ (Hino Motors Ltd), достигна 10,6 милиони единици, што претставува раст од 1,7 отсто на и онака силната побарувачка, се вели во соопштението на „Тојота“, објавено утрово.
Светскиот број еден производител на автомобили во јануари предвиде производство од дури 10,6 милиони возила за 2023 година. Подобрата понуда на чипови по продолжената светска криза со недостиг од полупроводници ѝ помогна на „Тојота“ да го достигне производството што ги надмина нивоата пред пандемијата.
Иако е предводник на остатокот од глобалната автомобилска индустрија и нејзините доставувачи, „Тојота“ е под зголемен притисок од компаниите што напредуваат во производството на чисто електрични автомобили, како што се „Тесла“ (Tesla Inc) и кинескиот гигант БИД (BYD Co).
Домашното производство и продажбата на „Тојота“ за 12-месечниот период се зголемија за 1,3 отсто, односно за 2,4 отсто, на 3,8 милиони единици и два милиона единици соодветно.
За март глобалното производство на „Тојота“ скокна за 4,2 проценти, на нов максимум од 1,1 милион возила, додека продажбата се искачи за 2,4 отсто, на еден милион автомобили. По објавата на финансиските резултати, утрово акциите на јапонскиот производител на автомобили се зголемија за 1,2 отсто.
.webp){kind=icon}
