„Хонда“ (Honda Motor Co) предвидува профит за тековната фискална година поголем од проекциите на аналитичарите, благодарение на закрепнувањето на производството на автомобили, падот на цените на некои материјали, како и големата продажба на мотори.
Компанијата соопшти и дека планира да откупи сопствени акции во вредност од 200 милијарди јени (1,5 милијардa долари).
Оперативната добивка за периодот до март 2024 година ќе биде една илјада милијарди јени (7,45 милијарди долари), се наведува во соопштението на компанијата, објавено утрово. Аналитичарите во просек проценуваа добивка од 7,42 милијарди долари. „Хонда“ информира дека нето-продажбата е на пат да надмине 136 милијарди долари, што е во согласност со процените на пазарот.
Компанијата има цел до 2040 година да продава само електрични автомобили на глобално ниво, а тие да претставуваат 100 отсто од нејзината продажба во Кина до 2035 година. И покрај тоа, „Хонда“ допрва треба да лансира електрично возило на масовниот пазар, иако работи со „Сони“ (Sony Group Corp.) на тоа да лансира електрично возило под друга марка, наречена „афила“ (Afeela).
За фискалната година што заврши во март, „Хонда“ објави оперативен профит од 6,25 милијарди долари. Продажбата се зголеми за 16 проценти, на 126 милијарди долари.
Во април главниот извршен директор на „Хонда“, Тошихиро Мибе, рече дека компанијата ќе соработува со „Тајван семикондактор“ (Taiwan Semiconductor Manufacturing Co) за набавка на чипови, со цел да ги анулира сите нарушувања во снабдувањето. Јапонската компанија е во преговори и со други производители на чипови.
„Хонда“ исто така соопшти дека потпишала договор со „ГС Јуаса“ (GS Yuasa Corp.) за започнување заедничка инвестиција за развој на литиумјонски батерии.
.webp){kind=icon}
