Производите на „Микросам“ од Прилеп до Месечината и Марс

Прилепската компанија „Микросам“ произведува машини за изработка на композитни делови. Основана е во 1990 година во Прилеп, а има канцеларии во Скопје и во Франкфурт. Компанијата има 180 вработени, од кои речиси половината се инженери. Во 2022 година извозот бил 15.000.000 евра, а нето-добивката изнесувала 780.000 евра. Во интервју за „Блумберг Адрија“ главниот директор за приходи Веле Самак објаснува дека фактот што треба да бидат присутни во целиот свет значи дека се присутни во конкурентни зделки и дека се борат со светски конкуренти. И тој предизвик дека мора да се претстават и да бидат секогаш подобри и поевтини од западните конкуренти е еден од главните мотиви и клуч за развој на компанијата.

„Заедно со холандската компанија 'ГКН Фокер' (GKN Fokker), која е доставувач во авионската индустрија, успеваме да направиме посебна машина и заедно со нив да доразвиеме еден дел што треба да биде составен дел од идната генерација на патнички авиони“, вели Веле Самак за „Блумберг Адрија“.

Самак појаснува дека ова треба да го забрза процесот на производство на такви патнички авиони, а „Микросам“ учествува во почетниот развој на таквите производи.

„Микросам“ со децении опстојува на светскиот пазар за машини, а доаѓа од мала земја, која нема домашна композитна индустрија. „Микросам“ е дел од попознатите фирми во светот, присутни во најголемиот американски истражувачки институт за воена индустрија, центар што последните години доста агресивно се развива.

„Пред неколку години случајно, преку сплет на околности, се појави една идеја на НАСА дали е можно да се прават композитни делови во вселената, доколку на пример се колонизира некоја планета, Месечината или Марс, за да се намали потребата од инфраструктура, машинерија и алати што се носат таму и да видиме дали можат да се прават тие композитни делови во вселената. Тоа беа неколку идеи, планови за кои една од американските фирми во соработка со НАСА дојде до 'Микросам' да направиме една таква проба, нешто што било одбиено од повеќе места во САД. Нашите инженери успеаја во рок од седум месеци да го развијат како таква ќелија со два робота што самостојно прават дел во просторот. Од тој концепт, од идеја на хартија произлезе една роботска ќелија што се наоѓа баш во институтот во САД што го спомнав, каде што продолжуваат да се развиваат таа технологија и можностите за таа идеја во вселената“, објаснува Самак.

Самак појаснува дека компанијата има испорачано повеќе од 320 производствени линии во над 45 земји, вклучувајќи ги Германија, Шведска, САД, Јапонија, Кина, Индија, Кореја, Турција и многу други.