Профитот на групацијата „Голдман Сакс“ драстично опадна бидејќи гигантот од Волстрит забележа еден од најслабите квартали под раководството на главниот извршен директор Дејвид Соломон.
Заработката во вториот квартал падна за 58 отсто поради слабоста во инвестициското банкарство, амортизацијата на недвижностите и отпишувањето на гудвил (т.е. разликата помеѓу пазарната и книговодствената вредност) во потрошувачкиот сектор, кој го вклучува и работењето на „Грин скај“ (GreenSky). Приносот на капиталот, клучна мерка за профитабилноста, падна на четири отсто - најлош резултат меѓу водечките американски банки.
Компанијата веќе ги намали очекувањата пред извештајот, што ги натера аналитичарите речиси да ги преполоват своите квартални процени за добивката од средината на јуни. Сепак, раководството се обиде да звучи пооптимистички за следните месеци.
Соломон рече дека спојувањата и пазарите на капитал се „суштински дел од нашата економија“ што нема да исчезне, иако тие се во пад веќе неколку квартали. „Мислам дека ова е циклус“, рече извршниот директор на конференциска врска со аналитичарите. „Не сме виделе циклус долго време, а другата страна на циклусот сепак ќе изгледа привлечно“.
Раководството на „Голдман Сакс“ работи на израмнување на кварталните резултати на компанијата, кои често флуктуираат и вклучуваа големи добивки за време на постпандемискиот бум, проследени со низа пропуштени цели за профитабилност. Инвеститорите сакаат да видат дали вториот квартал го претставува дното за оваа компанија со седиште во Њујорк и дали можеме да очекуваме постабилен раст на профитот во иднина.
„Сега ги открија сите проблеми“, рече Сенди Померој, менаџерка во „Нојбергер“ (Neuberger Berman Group). „Треба да покажат сигурност дека во однос на циклусот сме на дното и дека ги решиле сите нивни проблеми“.
Меѓу банките, „Голдман“ го забележа најголемиот пад на заработката во вториот квартал
Bloomberg
Померој, која купила акции на „Голдман Сакс“ во јануари, по падот од највисокото ниво во 2021 година, рече дека е подготвена да биде трпелива и да му даде време на раководството да реши некои прашања. „Ова е очигледно битка меѓу инвеститорите“, рече таа. „Веројатно повеќе од која било друга“ конкурентна компанија во финансискиот сектор.
Приходите од тргување со акции се светла точка, победувајќи ги водечките конкуренти со 3 милијарди долари, во споредба со процените од 2,47 милијарди долари. „Голдман Сакс“ го освојува првото место во таа деловна област во последните четири квартали.
Важно е да се напомене дека вкупните приходи од трговијата се намалени за само 14 отсто во однос на ажурираните бројки од минатата година. Тоа е многу помалку од падот од 25 отсто на кој предупреди претседателот на „Голдман Сакс“, Џон Валдрон, на почетокот на јуни.
Бизнисот за управување со средства и богатство забележа приход од 3,05 милијарди долари, што е за четири отсто помалку од претходната година и под процените на аналитичарите од 3,5 милијарди долари. Банката почувствува удар во секторот за недвижности, со отпишување и на нејзиното кредитно портфолио и на нејзините капитални инвестиции, што доведе до пад на приходите од главни инвестиции за 1,15 милијарда долари пред оданочување.
За разлика од повеќето свои главни конкуренти, „Голдман Сакс“ агресивно го користеше својот инвестициски биланс, стратегија што може да доведе до големи промени во резултатите. Компанијата настојува сè повеќе да се потпира на надоместоците од инвестирање пари за други институции и да ги намали сопствените вложувања.
Дејвид Соломон
Bloomberg
Банката исто така пријави зголемување на оперативните расходи поради начинот на кој ги евидентира исправките поврзани со некои нејзини консолидирани инвестиции во недвижности, како и отпис на гудвил. Тие намалувања изнесуваа околу една милијарда долари.
„Голдман Сакс“ се обиде да му го продаде бизнисот на „Грин скај“ помалку од една година откако го купи - еден од највидливите знаци за тоа колку менаџментот се повлече од својата стратегија за банкарство на мало во изминатата година. Тие исто така го отфрлија речиси целото заемодавачко портфолио на „Маркус“, што резултираше со добивка од приближно 100 милиони долари.
Друго забележливо влијание врз заработката беше зголемувањето на даноците на приходите што не се во САД. Тоа ја зголеми ефективната даночна стапка на компанијата на 22,3 отсто досега оваа година, од 19 отсто на крајот на март.
.webp){kind=icon}
