.webp){kind=icon}
Авионските билети се премногу евтини и нивната цена ќе мора да порасне во следните пет години. Само така авиокомпаниите можат да останат конкурентни, изјави извршниот директор на „Рајанер“ (Ryanair), Мајкл О'Лири во интервју за „Фајненшл тајмс“ (Financial Times).
Под водство на О'Лири, „Рајанер“ беше пионер на евтините летови, правејќи го воздушниот сообраќај достапен за милиони луѓе. Во исто време, тоа изврши притисок врз високиот профит на другите превозници.
Сега, зголемувањето на цените на нафтата и повисоките трошоци за заштита на животната средина може да ја зголемат цената на просечниот билет на „Рајанер“. Цената може лесно да се зголеми од 40 евра на 50 или дури 60 евра.
„Не верувам дека е одржливо на среден рок, да се задржи просечната цена на 40 евра. Тоа е премногу евтино. Цените на нафтата веројатно ќе останат на високи нивоа некое време, бидејќи ќе бидат потребни неколку години пред да можеме целосно да се одвикнеме од руската нафта и гас“, смета О'Лири.
Трошоците за гориво на ирската авиокомпанија ќе останат стабилни барем до крајот на годината, бидејќи најголемиот дел од горивото го заштити на 65 долари за барел, откри извршниот директор на „Рајанер“.
Цената на суровата нафта на пазарот во моментот се движи близу 110 долари за барел.
