text size
„Хајнекен“ (Heineken NV) соопшти дека го завршил договорот за продажба на своите средства и за излегување од Русија, станувајќи една од ретките потрошувачки компании што успешно ја напуштија земјата откако владата на Владимир Путин ги промени правилата за да го отежне излегувањето.
Холандската фирма ѝ ги продаде своите операции, вклучувајќи и седум пиварници, на руската компанија за пакување и производи за широка потрошувачка „Арнест груп“ (Arnest Group) за едно евро (1,08 долар) во зделка што ќе резултира со загуба од 300 милиони евра. Трансакцијата ги доби сите потребни одобренија, се наведува во соопштението на „Хајнекен“ и на тој начин компанијата го завршува процесот на напуштање на Русија што започна во март 2022 година.
Не постои опција за откуп или повик за враќање во Русија, а продажбата и финансиската загуба ќе имаат „незначително влијание“ на заработката по акција на „Хајнекен“, соопшти компанијата. Изгледот за целата година нема да се промени, се наведува во извештајот.
Потпишувањето на декретот од страна на Путин во април со кој се дозволува привремена државна контрола на имотот на компании или поединци од непријателски земји, во кои се вклучени САД и нивните сојузници, ги комплицираше напорите на големите компании да ја напуштат Русија. Успешното излегување на „Хајнекен“ е во контраст со судбината на конкурентот „Карлсберг“ (Carlsberg A/S), чии планови за продажба на домашните операции беа прекинати со владиното запленување на бизнисот во јули.
„Ова беше неверојатно сложено“, им рече на новинарите главниот извршен директор на „Хајнекен“, Долф ван ден Бринк. „Постоеше реален ризик од кривично гонење за нашите луѓе и реален ризик од национализација“.
Bloomberg
„Хајнекен“ се соочи со притисок од потрошувачите да излезе од Русија, која сочинуваше околу два отсто од глобалната продажба, и ја изрази својата намера да го стори тоа пред повеќе од една година, без да профитира од трансакцијата. Во април компанијата објави дека поднела барање до руската влада за одобрение за продажба. Таа претходно забележа вкупни загуби поради обезвреднување од 210 милиони евра поврзано со нејзините операции во Русија.
„Новиот сопственик нема да има право да го продава брендот ’Хајнекен’ во Русија според условите на договорот“, рече извршниот директор, „а брендот ’Амстел’ исто така ќе биде отстранет од пазарот, кој е втор по големина бренд“, додаде тој.
Во минатото, „Арнест“ беше купувач на средства на западните компании во Русија, со купувањето на „Бол корп“ (Ball Corp.), бизнис за пакување пијалаци, за 530 милиони американски долари во септември 2022 година.
„Хајнекен“ имаше околу 1.800 вработени во Русија, а „Арнест“ дава гаранции за вработување во следните три години, најави „Хајнекен“. Рускиот купувач ќе преземе и околу 100 милиони евра долг поврзан со работењето на „Хајнекен“. Работењето на „Хајнекен“ во Русија забележа загуби во шест од последните осум години, соопшти компанијата.
.webp){kind=icon}
