text size
Компаниите за луксузни стоки се соочуваат со ризик од разочарувачки раст на продажбата во Кина, што дополнително ќе влијае на цените на акциите. Во согласност со овие случувања, „Барклис“ (Barclays Plc) го намали рејтингот на францускиот конгломерат ЛВМХ (LVMH), како и на пошироката индустрија.
„Секторот за луксузни стоки претрпе сериозно намалување на рејтингот во текот на изминатиот месец, што мислиме дека е одраз на влошувањето на макро показателите што доаѓаат од Кина и постепеното враќање на понормален раст“, напишаа аналитичарите предводени од Карол Маџо во белешка доцна во средата.
ЛВМХ падна за 0,3 отсто на 727,20 евра во Париз, намалувајќи ги загубите од дури 1,3 отсто. Најниското ниво вчера беше за петтина пониско од рекордното високо ниво од 902 евра забележано во април.
Маџо го намали рејтингот на акциите на ЛВМХ (LVMH - Moet Hennessy Louis Vuitton SE) за едно ниво и ја спушти целната цена на акцијата на 835 евра (од 932). Постои ризик од разочарување во втората половина, откако маржите на компанијата паднаа под проценките на крајот на минатата година и во првата половина на 2023 година, велат аналитичарите на „Барклис“.
„Со оглед на тоа што го гледаме ЛВМХ како показател за секторот, ние исто така ги намаливме нашите изгледи за индустријата од позитивни на неутрални“, напишаа аналитичарите.
Луксузните акции го предводеа растот на европскиот пазар во текот на првата половина од годината, но оттогаш го загубија импулсот. Акциите на ЛВМХ се зголемија за седум отсто од почетокот на годината, додека францускиот индекс CAC 40 напредуваше за 11 отсто.
Акциите на „Хермес“ (Hermes International) пораснаа за 0,6 отсто, додека акциите на сопственикот на „Картие“ (Cartier) не претрпеа промени.
.webp){kind=icon}
