Новите вакцини на „Фајзер“ и ГСК ќе им донесат 2 милијарди долари

ГСК (GSK Plc) и „Фајзер“ (Pfizer Inc.) се на пат да ја зголемат продажбата на нивните нови вакцини и само од тоа да инкасираат 2 милијарди долари, што е за пет пати повеќе од првичните очекувања, пишува „Блумберг интелиџенс“. Станува збор за вакцини против респираторен синцицијален вирус - РСВ (од англиски: RSV - Respiratory syncytial virus, чест респираторен вирус што обично предизвикува слаби симптоми, слични на настинка) што се наменети за постари возрасни лица. 

Првичните податоци од продажбата на рецепти во САД за вакцините „аксви“ на ГСК и „ејбрајсво“ на „Фајзер“ покажуваат дека за нив има многу поголема побарувачка од очекуваната, напиша аналитичарот на „Блумберг интелиџенс“ Џон Марфи. Ако тој интерес се одржи, само во САД оваа година ќе бидат вакцинирани до 6,5 милиони пациенти.

Двете РСВ-вакцини за луѓе од над 60 години на пазарот се нешто повеќе од два месеца, откако научниците работеа шест децении за да развијат имунизација против вообичаениот, но понекогаш и смртоносен респираторен синцицијален вирус. Глобалната продажба на вакцините за возрасни против РСВ се очекува да достигне 10 милијарди долари до 2032 година, според „Блумберг интелиџенс“ (Bloomberg Intelligence).

Процените на аналитичарите за приход од 340 милиони американски долари во 2023 година за двете вакцини против РСВ за возрасни „изгледаат несоодветно на податоците од првично издадените рецепти што ги анализиравме“, пишува Марфи во својата истражувачка белешка.

Покрај двете вакцини за возрасни одобрени за употреба оваа година, „Фајзер“, „Санофи“ и „Астразенека“ добија одобрение од Управата за храна и лекови на САД за имунизација на РСВ за доенчиња.

ГСК го победи „Фајзер“

Марфи очекува ГСК само во САД годинава да продаде вакцини за возрасни за околу 1,1 милијарда долари, додека „Фајзер“ ќе има приход од тоа во вредност од 680 милиони долари. 

ГСК веројатно го победува „Фајзер“ поради големата рекламна кампања, во која глуми поранешната НБА-ѕвезда Ервин Меџик Џонсон, и поедноставниот процес на дозирање, пишува Марфи. Тој вели дека „Фајзер“ исто така може да биде повеќе фокусиран на својата многу поголема франшиза за ковид-19.

„Фајзер“ би можел на тој начин да излезе како победник, бидејќи со месеци се бори со слабата побарувачка за неговите вакцини против ковид. Акциите на компанијата паднаа за 35 отсто оваа година, што е најмногу меѓу петте најголеми американски фармацевтски компании.

Bloomberg Mercury

 

Откриен во 1956 година, РСВ е водечка причина за хоспитализација на доенчиња и исто така може да се покаже опасен за постарите лица. Според Националниот институт за алергија и заразни болести на САД, вирусот погодува околу 64 милиони луѓе на глобално ниво и предизвикува 160.000 смртни случаи секоја година.

Во моментов нема коментари за веста. Биди прв да коментира...

Остави коментар