Акциите на „Ериксон“ (Ericsson) паднаа на најниско ниво во последните шест години, откако компанијата соопшти дека слабоста на пазарот ќе продолжи во четвртиот квартал и понатаму. Причината за ваквиот пад лежи во тоа што компанијата мака мачи да го компензира намалувањето на инвестициите во мобилната инфраструктура од петтата генерација од американски и европски оператори.
„Очекуваме основната несигурност што влијае на нашата деловна единица за мобилни мрежи да трае до 2024 година“, посочи шведскиот производител на опрема за 5Г во објавувањето на заработката за третиот квартал.
Уште минатата недела „Ериксон“ ја најави кварталната заработка и објави намалување на деловната единица „Вонеџ“ (Vonage), која е фокусирана на компаниите и која ја купи минатата година за 32 милијарди круни (2,9 милијарди долари). Компанијата во вторникот соопшти дека очекува маржа на добивка пред камата, данок и амортизација во тековниот квартал од околу 10 проценти и на неодредено време ја потисна својата цел од опсег од 15 до 18 проценти.
Цените на акциите паднаа за цели 9,5 отсто, на 48,82 круни во Стокхолм, односно на најниско ниво од 19 октомври 2017 година.
Претходно, „Ериксон“ предвиде закрепнување на пазарот на мобилната мрежа кон крајот на годината и нагласи дека се фокусира на зголемување на ЕБИТДА следната година, особено на долниот дел од целта. Сега компанијата вели дека има цел да го достигне тоа ниво „што е можно поскоро“.
„Одлучивме да не даваме насоки за 2024 година, бидејќи времето на тоа закрепнување, иако сме убедени дека ќе дојде, е неизвесно“, рече главниот финансиски директор Карл Меландер во телефонско интервју.
Компанијата се бори да се приспособи додека операторите во САД и Европската Унија се обидуваат да ги намалат капиталните расходи и да ги приспособат своите резерви. По вториот квартал, и „Ериксон“ и финскиот ривал „Нокиа“ (Nokia) предупредија на послаба продажба во Северна Америка.
Според аналитичарите на „Барклис“ (Barclays), Сајмон Колс и Рохан Бал, насоките за четвртиот квартал се под очекувањата, а одложувањето на целта за среднорочната маржа сугерира надолен ризик.
„'Ериксон' проектира дека сегашните пазарни услови ќе траат до 2024 година, што, според нас, значи дека закрепнувањето во САД не се случува толку брзо како што се очекуваше“, велат Колс и Бал во нивната белешка.
.webp){kind=icon}
