.webp){kind=icon}
Нова љубљанска банка (НЛБ) е подготвена да се прошири во земјите од Западен Балкан во наредните години, на што веќе укажа и стекнувањето на „Самит лизинг“. Како што објави „Блумберг“, банката е во „преземачка треска“ во последните пет години, бидејќи се натпреварува со унгарската „ОТП банка“ и го зајакнува своето присуство во Западен Балкан; не е присутна само во Хрватска. Таа би сакала да влезе таму, но проблемите од минатото засега ја спречуваат во тоа.
„Лесно би можеле да купиме средна банка во Хрватска или една од водечките банки во Србија“, рече шефот на НЛБ, Блаж Бродњак, во интервју за „Блумберг“ минатата недела. „Банкарската групација има капацитет за спојување и преземање од четири милијарди евра и бара потенцијални цели за преземање во Западен Балкан“, рече тој.
Како што објавивме, НЛБ купи стопроцентен удел во „Самит лизинг“ од „Аполо“ и Европската банка за обнова и развој (ЕБОР), со што преку својата подружница влезе на хрватскиот пазар „преку задна врата“. Сè уште се чека одобрението од регулаторите за да се заврши преземањето.
НЛБ, која во 2020 година ги купи српската „Комерцијална банка“ и филијалата на „Сбербанк“ во Словенија по почетокот на војната во Украина, во мај следната година ќе претстави долгорочна деловна стратегија. Србија, која бележи брз економски раст и има 6,8 милиони жители, претставува важен пазар за НЛБ. „Би биле многу заинтересирани доколку се продава голема српска банка“, рече Бродњак, додавајќи дека во спротивно очекуваат голема конкуренција.
Следната година НЛБ планира да издаде две обврзници, со вкупна вредност од 800 милиони евра, доколку пазарните услови се погодни за тоа.
Банката остварува профит
Добивката на „НЛБ груп“ по оданочување во третиот квартал изнесува 144,2 милиони евра, што е зголемување од 18 отсто во однос на претходниот квартал. Истовремено, нето-приходите достигнаа 289,2 милиони евра, што е за седум отсто повеќе на квартална основа. Бидејќи во првите девет месеци оствариле 800,8 милиони евра нето-приход (42 отсто повеќе во однос на истиот период лани), годинава очекуваат приходите да надминат една милијарда евра.
Кај сите банки членки на групацијата нето-приходите од камати се зголемени дури за 70 отсто на годишна основа. Растот е главно од кредитите на клиентите со 190,1 милиони евра (од кои 74,2 милиони евра им се доделени на домаќинствата и 115,9 милиони евра на стопанството и државата), а остатокот од салда кај банките и централните банки.
