Зошто „УНИ Банка“ реши да ги откупи првите перпетуални обврзници?

Одборот на директори на Македонската берза неодамна донесе одлука за исклучување од котација на перпетуалните обврзници - прва емисија издадени од „УНИ Банка“ по поднесено барање на издавачот, а врз основа на одлука од собранието на акционери на банката. Со неа, акционерите на „УНИ Банка“ ја искористиле опцијата за откуп и повлекување на целата емисија на обврзници. Прашавме од кои причини банката се одлучи на ваков чекор.

Од банката објаснуваат дека во согласност со одлуката за издавање капитален инструмент по пат на приватна понуда (прва емисија на перпетуални обврзници во вкупен износ од 5.000.000 евра), банката може по сопствено видување да го искористи правото на предвремен откуп (куповна опција) и по истекот на пет години од датумот на регистрирање на обврзниците во ЦДХВ да ја откупи целата емисија од имателите на обврзниците по номинална вредност од 1.000 евра, со согласност од НБРМ.

„Имајќи ги предвид движењата на каматните стапки, високата капитализираност, профитабилноста и ликвидноста на банката, акционерите на ’УНИ Банка’ одлучија да ја искористат куповната опција на обврзниците“, велат од банката.

Оттаму додаваат дека износот на издадената трета емисија на перпетуални обврзници и искажаната добивка даваат уверување дека намалeниот капитал на банката, по извршеното откупување на првата емисија на перпетуални обврзници, ќе биде заменет со капитал со ист и подобар квалитет.

Високи камати

На прашањето дали главната причина за тоа е предвиденото зголемување на каматата на оваа обврзница од 9 на 11 проценти, од банката велат дека во одлуката за издавање капитален инструмент по пат на приватна понуда (прва емисија на перпетуални обврзници) е предвидено обврзниците да имаат фиксна каматна стапка од 9 проценти на годишно ниво за првите пет години од датумот на издавање на  обврзницата, а по истекот на тој период каматната стапка се зголемува на 11 проценти на годишно ниво, со полугодишна исплата на каматата.

„При самото издавање на обврзниците, очекувањата на инвеститорите беа дека банката на најрационален начин ќе го искористи собраниот капитал и по пет години ќе им ги врати инвестираните средства и каматата на имателите на обврзниците. Тоа претставуваше мотив на банката, која со своето успешно и профитабилно работење го зголеми кредитно портфолио, кое искреира доволно средства за сервисирање на каматата и отплата на главнината“, наведуваат од „УНИ Банка“.

Од банката укажуваат дека при носењето на одлуката за користење на куповната опција биле земени предвид трендовите на движење на каматните стапки и цената на овој вид инструменти на пазарот на капитал, како и предвидувањата за намалување на каматните стапки во наредниот период.

Колку обврзници има „УНИ Банка“ во моментов?

Инаку, „УНИ Банка“ во моментов има активни две емисии на перпетуални обврзници што претставуваат прв финансиски инструмент од овој вид на македонскиот пазар на капитал, кои котираат на официјалниот пазар на Македонската берза АД Скопје, во потсегментот Берзанска котација.

Станува збор за перпетуални обврзници од втората емисија, издадени во 2022 година, 2.500 обврзници со номинална вредност од 1.000 евра во вкупен износ од 2.500.000 евра со фиксна каматната стапка од 5 проценти на годишно ниво за првите пет години. По завршување на овој период, каматната стапка се зголемува на 7 проценти на годишно ниво, со полугодишна исплата на каматата.

Исто така, издадени се перпетуални обврзници од третата емисија во 2023 година. Тоа се 1.350 обврзници со номинална вредност од 1.000 евра, во вкупен износ од 1.350.000 евра со фиксна каматната стапка од 6 проценти на годишно ниво за првите пет години, а по завршување на овој период каматната стапка се зголемува на 8 проценти на годишно ниво, со полугодишна исплата на каматата.   

Рано е за прогнози

На нашето прашање какви се плановите на банката со овие обврзници односно дали може да се  очекува откуп од страна на банката, од „УНИ Банка“ велат дека двете активни котирани обврзници немаат рок на достасување и дека можноста за предвремен откуп започнува од 2027 и 2028 година.

„Во зависност од развојниот план на банката и макроекономскиот амбиент, акционерите ќе донесат соодветни одлуки. Засега сè уште е рано да се даваат прогнози, така што имателите на обврзниците можат да очекуваат солидни приноси во наредните неколку години“, потенцираат од „УНИ Банка“.

Од банката го посочуваат примерот со првата емисија во која имателите на обврзниците за пет години добија вкупен нето-принос од инвестицијата од над 40 проценти.

„Во меѓувреме имателите на обврзниците и инвеститорите  можат да тргуваат со обврзниците на официјалниот пазар на Македонската берза“, велат од банката.

Обврзниците неискористен потенцијал

„Блумберг Адрија“ веќе пишуваше дека без разлика дали станува збор за граѓански, корпоративни, државни или други видови обврзници, тие се ефикасен инструмент за стекнување свеж капитал и можат да придонесат кон раздвижување на Македонската берза и на берзите во регионот Адрија, кои подолг период се подзаспани и повеќето бележат намалување на прометот.

Граѓанските или таканаречените народни обврзници и државни записи што беа издадени во текот на минатата година на пазарите на капитал привлекоа и доста неискусни мали инвеститори и направија позитивни раздвижувања, но тоа не се одрази на прометот на регионалните берзи. Берзите во Љубљана, Загреб, Белград, Сараево, Бања Лука и во Скопје лани оствариле вкупен промет од 1,74 милијарда евра. Претходната година прометот на сите берзи во регионот Адрија беше за 50 милиони евра поголем од лани, вкупно 1,80 милијарда евра.

Иван Штериев, извршен директор на Македонската берза, во интервју за ТВ „Блумберг Адрија“ неодамна рече дека во Македонија добрите компании лесно и брзо добиваат кредити од банките и дека постои голема ликвидност во банкарскиот сектор. Според него, тоа е дефинитивно клучниот одговор зошто нема корпоративни обврзници.

„Дополнително, во комбинација со недоволниот степен на познавање на оваа проблематика, кревкиот пазар на капитал што го имаме, малобројните финансиски посредници што не се многу проактивни, освен банките што нудат примарно кредити, страв од непознатото, страв од неуспех, сето тоа е еден сплет на околности поради кои корпоративни обврзници во Македонија сè уште нема“, вели Штериев.

 

Во моментов нема коментари за веста. Биди прв да коментира...

Остави коментар