Србинот Митиќ влегува во Одборот на директори на „Македонски телеком“

Србинот Младен Митиќ е предложен за нов независен неизвршен член на Одборот на директори на „Македонски телеком“. Неговиот избор треба да се случи на 15-ти месецов, за кога е закажана седница на собранието на друштвото. На таа седница впрочем треба да биде констатирано отповикувањето на Мартин Ренер, државјанин на Германија, кој дотогаш ќе ја има функцијата на независен неизвршен член. Во Одборот на директори повторно ќе биде реизбран Словакот Лубор Жатко.

Митиќ е државјанин на Србија, но уште од 2011 година има интернационално искуство во телеком-индустријата. Работел во „Теленор“ Норвешка, во данска телекомуникациска компанија, а од 2020 година е во „Дојче телеком“ во Бон, Германија. Во неговата биографија е наведено дека од септември 2021 година до денеска е член на одборот и главен комерцијален директор за масовен пазар во „Словачки телеком“.

Во Одборот на директори што управува со друштвото членуваат 14 члена, од кои 13 се неизвршни членови, а еден е извршен член, кој всушност е и главен извршен директор, а четворица од неизвршните членови се независни членови на Одборот на директори. Претседател во Одборот во моментот е Игор Милев, кого го предложи Владата, а негов заменик е поранешниот министер за земјоделство, шумарство и водостопанство и за животна средина Садула Дураки.

Прочитајте повеќе: Милев ќе зема помал надоместок од Китанов во „Македонски телеком“.

Во Одборот членува и главниот извршен директор Никола Љушев, а неизвршен член е и поранешната министерка за финансии Нина Ангеловска.