Паѓаат цените на електричните возила на „Тесла“

„Тесла“ го помина викендот намалувајќи ги цените на своите модели низ Кина, Европа и САД поради падот на продажбата и големите резерви.

Доцна во саботата компанијата предводена од Илон Маск исто така ја намали цената на софтверот за помош на возачите што го нарекува ФСД (FSD или Full Self-Driving - целосно самостојно возење), за една третина, на 8.000 долари во САД. Претходната цена изнесуваше 12.000 долари.

Ветувањето за целосно самостојно возило долго време беше клучно за високата вредност на „Тесла“. Во последниве недели компанијата објави нови верзии на софтверот ФСД, а Маск вети дека ќе претстави и роботакси на 8 август.

На веб-страницата на „Тесла“ се наведува дека со купување ново возило, клиентите ќе добијат 30-дневен пробен период полн со можности за самостојно возење. Веб-страницата истакнува дека „моментално овозможените функции бараат активен надзор од возачот и не го прават возилото самостојно“.

Претходно во текот на викендот компанијата ги намали цените во Кина и во САД, нејзините два клучни пазара, како и во Европа, откако разочарувачките продажби во првиот квартал придонесоа за повисоки резерви.

Во Кина, „Тесла“ ги намали цените на целата палета, при што „модел 3“ падна на 231.900 јуани (32.000 долари) од 245.900 јуани претходно. „Модел Y“ е намален на 249.900 јуани - или околу 34.500 долари - од 263.900 јуани.

Во САД најевтината верзија на „модел Y“ сега чини 42.990 долари, со што почетната цена на теренецот се враќа на најниско ниво. „Тесла“ исто така даде попусти за две други поскапи верзии на „модел Y“ за 2.000 долари и ја спушти цената на „модел X“ на најниско ниво досега.

Bloomberg Mercury

Кратењата го означуваат крајот на една дива недела за производителот на автомобили со седиште во Остин. Сè започна кога Маск испрати меморандум до повеќе од 140.000 вработени во компанијата дека го намалува бројот на работници за повеќе од 10 отсто на глобално ниво. Заминаа и двајцата главни менаџери.

Во средата „Тесла“ објави дека ќе побара од акционерите повторно да гласаат за пакетот за компензација од 56 милијарди долари за Маск, кој беше укинат од судот во Делавер во јануари.

Во петокот компанијата повлече речиси 3.900 пикапи „сајбертрак“ за да им ги поправи или замени педалите за гас, кои може да предизвикаат ненамерно забрзување на возилото, зголемувајќи го ризикот од несреќа.

Маск го одложи и планираното патување во Индија, каде што се очекуваше да се сретне со премиерот Нарендра Моди, велејќи дека мора да се справи со „големите обврски“ во компанијата.

На 23 април „Тесла“ ќе ја објави својата заработка од првиот квартал. Акциите паднаа за повеќе од 40 отсто годинава поради загриженоста за падот на продажбата, интензивирањето на конкуренцијата во Кина и ризичниот план на Маск да „вози“ кон автономија.

Производителот на автомобили го пријави својот прв пад на продажбата по почетокот на пандемијата, испорачувајќи 386.810 возила во првиот квартал, што е далеку под процените на аналитичарите.

Во Кина пазарниот удел на „Тесла“ се намали на околу 6,7 отсто во четвртиот квартал од 2023 година, од 10,5 отсто во првите три месеци од годината, според пресметките на „Блумберг“ врз основа на податоците од Кинеската автомобилска асоцијација.

Производителот на автомобили неодамна ги намали плановите за производство во фабриката во Шангај, објави „Блумберг“ кон крајот на минатиот месец. Испораките од фабриката во Шангај - која произведува електрични возила за Кина и за извоз во други делови на Азија, Европа и Канада - паднаа во првите два месеца од претходната година, дури и кога вкупната продажба на патнички возила во Кина се зголеми.