„Тесла“ отпушта над 14.000 работници

„Тесла“ (Tesla Inc.) ќе ја намали својата работна сила на глобално ниво за повеќе од 10 отсто, објави „Електрек“ (Electrek), бидејќи се соочува со забавување на побарувачката за електрични возила.

Илон Маск го наведува „дуплирањето на работни позиции и функции во одредени области“ како причина за отпуштањата, пренесува „Електрек“, повикувајќи се на е-пошта што извршниот директор на „Тесла“ ја испратил до персоналот. Под претпоставка дека отпуштањата се однесуваат на целата компанија, тоа значи дека ќе бидат отпуштени повеќе од 14.000 вработени.

„Тесла“ објави „катастрофални испораки на возила“ на почетокот на април, кои беа со голема разлика под очекувањата, и го забележа првиот квартален пад во последните четири години. Неколку аналитичари предвидуваат пад на продажбата на „Тесла“ за годинава, наведувајќи го бавното производство на нејзиниот најнов модел „сајбертрак“ (Cybertruck), како и затишјето во производството на нови модели додека „Тесла“ не започне со производство на своето возило од „следната генерација“ кон крајот на 2025 година.

„Додека ја подготвуваме компанијата за нашата следна фаза на раст, исклучително е важно да се погледне секој аспект на компанијата за да се намалат трошоците и да се зголеми продуктивноста“, напишал Маск во е-поштата, додавајќи: „Како дел од тој напор, ние спроведовме темелен преглед на организацијата и донесовме тешка одлука да се намали бројот на вработени за повеќе од 10 проценти на глобално ниво. Нема нешто што повеќе мразам, но мора да се направи тоа“.

„Тесла“ ја заврши минатата година со 140.473 вработени, што е речиси двојно повеќе од три години претходно. Исто така, го зголемува производството во две фабрики, едната во Остин (Тексас) и другата надвор од Берлин, кои започнаа со производство на спортски теренци - 'модел уај' (Model Y) - на почетокот на 2022 година. Како што се зголемуваа овие погони, „Тесла“ почна да ги намалува цените.

Акциите на компанијата паднаа за 31 отсто годинава, со што се рангираа меѓу најлошите резултати во кошницата на индексот S&P 500. Пред почетокот на редовното тргување во понеделникот, акциите паднаа дури за 1,2 отсто.

Персоналот на „Тесла“ стравуваше од потенцијални кратења на работните места уште од почетокот на годинава, кога од менаџерите беше побарано да потврдат дали секоја позиција на нивните вработени е критична. На некои вработени исто така на крајот на минатата година им беше кажано дека компанијата нема да понуди парични награди засновани на заслуги како дел од годишните прегледи на перформансите. „Едноставно мора да трчаме по секое можно пени“, рече главниот финансиски директор Ваибхав Танеја за време на најновиот извештај за заработка на „Тесла“ на 24 јануари.

Во моментов нема коментари за веста. Биди прв да коментира...

Остави коментар