Анкета на „Тесла“ за критични работни места разгоре страв од отпуштања

Персоналот на „Тесла“ (Tesla Inc.) се подготвува за потенцијални кратења на работните места, откако од менаџерите било побарано да потврдат дали позицијата на секој од нивните вработени е критична.

Американските менаџери мораа да направат бинарна процена на улогите на нивните заменици во последните денови, според лица запознаени со ова прашање, кои побараа да не бидат именувани бидејќи станува збор за приватни информации. „Тесла“ го испратила барањето за секое работно место откако ја откажа ревизијата за сработеното за некои вработени, велат некои од изворите.

Прашањето е во согласност со целта на Илон Маск за намалување на трошоците во ек на значително забавување на растот на продажбата на производителот на електрични возила. Познато е дека главниот извршен директор има непоштеден пристап кон компаниите што ги води - кон крајот на 2022 година им даде ултиматум на вработените во Твитер или да се посветат на неговиот „хардкор“ етос или да си заминат.

Претставниците на „Тесла“ не одговорија веднаш на барањето за коментар.

„Тесла“ приближно ја удвои својата работна сила од 2020 година, завршувајќи ја минатата година со повеќе од 140.000 вработени на глобално ниво. Компанијата вработува околу осум пати повеќе луѓе отколку во 2016 година, годината пред лансирањето на седанот „модел 3“ (Model 3).

Бројот на вработени се зголеми за речиси 10 отсто минатата година, дури и кога „Тесла“ направи одредени намалувања. Во февруари 2023 година компанијата отпушти десетици вработени во Бафало, Њујорк, кои означуваа податоци за нејзиниот систем за автоматска асистенција на возачот наречен автопилот (Autopilot). Производителот на автомобили негираше дека ги отпуштил работниците како одговор на синдикалната кампања објавена таа недела.

Маск (52) за време на кварталниот извештај за заработка на „Тесла“ минатиот месец рече дека компанијата се наоѓа „помеѓу два големи брана на раст“ - првиот што извира од воведувањето на „модел 3“ и „уај“ (Y), а следниот се очекува да дојде од возило со пониска цена на крајот на следната година.

„Тесла“ ги означи големите трошоци за електричното возило од следната генерација и други иницијативи за раст, буџетирајќи повеќе од 10 милијарди долари капитални расходи оваа година. Аналитичарите исто така очекуваат компанијата да ги зголеми трошоците за истражување и развој на околу 4,5 милијарди долари.

Во моментов нема коментари за веста. Биди прв да коментира...

Остави коментар