Земјите во трка за чипови со вештачка интелигенција, ТСМЦ профитира

Мајските продажби на компанијата ТСМЦ (Taiwan Semiconductor Manufacturing Co. / TSMC) се зголемија за 30 отсто, на 229,6 милијарди нови тајвански долари (7,1 милијарди американски долари), благодарение на зголемената побарувачка за вештачка интелигенција и закрепнувањето во сегментот на потрошувачка електроника.

Најголемиот светски производител на чипови - по обем на договори - профитираше од глобалната трка за развој на услуги во областа на вештачката интелигенција, произведувајќи полупроводници за „Енвидија“ (Nvidia Corp). Тие чипови потоа им се продаваат на компании како „Мајкрософт“ (Microsoft Corp.) и „Опен еј-ај“ (OpenAI).

Глобалната продажба на паметни телефони исто така излезе од продолжениот циклус на пад во првите три месеци од годината, поттикнувајќи ги очекувањата дека нарачките за мобилни уреди ќе бидат силни.

ТСМЦ со седиште во Хсинчу успеа да одржи високи маржи додека светот брза да изгради центри за податоци. Исто така, компанијата е ексклузивен производител на најнапредните акцелератори за вештачка интелигенција на „Енвидија“, а произведува и полупроводници за „Епл“ (Apple Inc.) и АМД (Advanced Micro Devices Inc.), најблискиот ривал на „Енвидија“.

Неделава претседателот и извршен директор на ТСМЦ, Ц.Ц. Веи, ги повтори очекувањата дека развојот на вештачката интелигенција ќе го поттикне секторот и ќе доведе до големо закрепнување годинава.