.webp){kind=icon}
„Сименс енерџи“ (Siemens Energy AG) им соопштила на клиентите дека планира да ја произведе својата најголема турбина на ветер, потенцијално до крајот на деценијата, бидејќи компанијата се обидува да ја задржи својата лидерска позиција во еден од најбрзорастечките енергетски сектори.
Компанијата има цел да произведе ветерна турбина за море способна да произведува околу 21 мегават моќност, надминувајќи ги најголемите машини понудени од кинеските конкуренти, според извори на „Блумберг“ запознаени со ова прашање, кои побараа да не бидат именувани бидејќи информациите се приватни.
Планираната турбина на ветер би била околу 40 отсто помоќна од сегашната најголема турбина на „Сименс“, која има сечила долги 115 метри. Овој потег би можел повторно да ја разгори трката меѓу западните компании за развој на поголеми машини за обновлива енергија, која беше во мирување бидејќи индустријата се соочи со големи загуби во последниве години.
Секторот за производство на турбини на ветер на „Сименс енерџи“ е во застој поради тесните грла во синџирот на снабдување, зголемените трошоци и проблеми со квалитетот на турбините на ветер. Повеќето од проблемите на компанијата произлегуваат од нејзиниот бизнис со турбини на ветер на копно, додека компанијата ја задржа својата улога како најголем снабдувач на турбини за офшор ветерни електроцентрали надвор од Кина.
Минатата година Европската Унија му додели 30 милиони евра на „Сименс“ (Siemens Gamesa) за да го тестира, како што рече компанијата, „најмоќниот прототип на турбина на ветер во светот“ во објект во Остерилд, Данска. Но наградата не вклучува никакви детали за големината на машината или кога таа потенцијално би се појавила на пазарот.
„Ќе одлучиме дали евентуално да го вклучиме новиот производ во комерцијален проект само по внимателно тестирање“, изјави тогашниот портпарол на „Сименс енерџи“.
Предизвици
„Сименс“ исто така се соочува со зголемена конкуренција од својот главен ривал, данската „Вестас“ (Vestas Wind Sistems A/S), која го зголеми својот фокус на турбини на море. Извршниот директор на „Вестас“, Хенрик Андерсен, тврди дека турбините, кои сега се големи како облакодери, се доволно големи.
Додека компаниите претходно брзаа да пуштат нови модели што е можно побрзо, „Сименс енерџи“ и неговите конкуренти забавија во обидот да извлечат поголем профит од сегашните верзии. Нова масивна турбина би сигнализирала дека „Сименс енерџи“ гледа промена на пазарот.
Претходно, зголемувањето на големината на турбините помогна да се намалат трошоците за енергијата произведена во парковите со ветерници. Но неодамнешните проблеми со квалитетот и доверливоста во индустријата би можеле да го тестираат апетитот на купувачите. Неодамнешната аукција за ветер на море во Њујорк пропадна бидејќи „Вернова“ (GE Veranova) рече дека нема да може да ја испорача новата, поголема турбина што планираа да ја купат успешните понудувачи.
