„Опен еј-ај“ на пат да го удвои годишниот приход на 3,4 милијарди долари

„Опен еј-ај“ (OpenAI) е на пат да генерира 3,4 милијарди долари годишен приход, му изјавил извршниот директор Сем Алтман на персоналот на компанијата, според упатен анонимен извор.

На заеднички состанок во средата, Алтман рекол дека огромното мнозинство од тие приходи (околу 3,2 милијарди долари) доаѓа од производите и услугите на компанијата. Тој исто така изјавил дека „Опен еј-ај“ е на пат да генерира околу 200 милиони долари нудејќи пристап до своите модели со вештачка интелигенција преку Мајкрософт азур (Microsoft Azure).

Ова се првите достапни информации за нивото на приходите, а претходно беше објавено дека годишниот приход на компанијата бил 1,6 милијарда долари на крајот на 2023 година. „Опен еј-ај“ одби да коментира.

„Опен еј-ај“ инаку се појави како движечка сила во развојот на вештачката интелигенција (ВИ), благодарение на растечкиот успех на ЧетГПТ (ChatGPT), што го поттикна бесот околу генеративната вештачка интелигенција.

Претходно годинава „Опен еј-ај“ ја заврши тендерската понуда со која стартапот беше проценет на 86 милијарди долари. Во последниве месеци работеше на зголемување на приходите од своите производи со вештачка интелигенција со продажба на услуги на деловни клиенти.

„Опен еј-ај“ исто така започна да тренира помоќен модел на вештачка интелигенција што би можел да му помогне да ја задржи позицијата пред сè поголемиот број финансиски силни ривали што се борат за истите деловни корисници.

Неделава стартапот ја ангажира Сара Фриар, поранешна извршна директорка на „Некстдор холдингс“ (Nextdoor Holdings Inc.), како главна финансиска директорка. Таа позиција беше празна две години, додека „Опен еј-ај“ постигна брз напредок.

Фриар ќе му помогне на „Опен еј-ај“ да продолжи да инвестира во истражување на вештачката интелигенција додека го унапредува својот бизнис низ светот, соопшти американскиот стартап.