Вработени во „Опен еј-ај“ бараат заштита за да обелоденат „сериозни ризици“ од ВИ

Група сегашни и поранешни вработени од „Опен еј-ај“ (OpenAI) и „Гугл дипмајнд“ (Google DeepMind) повикуваат на заштита од одмазда поради тоа што споделуваат загриженост за „сериозните ризици“ од технологиите што ги создаваат овие и други компании.

„Сè додека не постои ефективен владин надзор над овие корпорации, сегашните и поранешните вработени се меѓу ретките луѓе што можат да бараат одговорност пред јавноста“, се наведува во јавното писмо, кое го потпишале 13 луѓе што работеле во компаниите, од кои седум ги вклучиле и нивните имиња. „Сепак, деталните договори за доверливост не спречуваат да ја изразиме нашата загриженост, освен кај самите компании што можеби не успеваат да ги решат овие прашања“.

Во последниве недели „Опен еј-ај“ се соочи со контроверзии во врска со пристапот кон безбедноста на вештачката интелигенција (ВИ), откако расформира еден од најпознатите безбедносни тимови и беше погодена од серија заминувања на персоналот. Вработените во „Опен еј-ај“ исто така изразија загриженост откако на работниците им било посочено да потпишат договори поврзани со нивните акции во компанијата, што потенцијално ќе придонесат да изгубат профитабилни зделки за капитал доколку зборуваат против стартапот за вештачка интелигенција. По извесен притисок, „Опен еј-ај“ соопшти дека ќе ги ослободи поранешните вработени од договорите.

Џејкоб Хилтон, еден од поранешните вработени во „Опен еј-ај“ што го потпишаа писмото во вторникот, на X напиша дека компанијата заслужува заслуга за промената на политиката, „но вработените сè уште може да се плашат од други форми на одмазда поради обелоденување, како што се отпуштање и тужба за отштета“.

Bloomberg

Во изјавата испратена до „Блумберг“, портпаролот на „Опен еј-ај“ рече дека компанијата е горда на својот „пристап што ги обезбедува најспособните и најбезбедните системи за вештачка интелигенција и верува во научен пристап за справување со ризикот“. Портпаролот додаде: „Се согласуваме дека отворена дебата е клучна со оглед на значењето на оваа технологија и ќе продолжиме да се координираме со владите, граѓанското општество и другите заедници низ светот“.

Претставник на „Гугл“ не одговори веднаш на барањето за коментар.

Во писмото, кое беше насловено Право на предупредување околу напредната вештачка интелигенција, вработените велат дека се загрижени бидејќи водечките компании за оваа технологија „располагаат со силни финансиски стимулации за да избегнат ефективен надзор“. Од друга страна, компаниите имаат „слаби обврски“ да ги споделат со јавноста вистинските опасности од нивните системи за вештачка интелигенција, велат тие.

Во писмото се тврди дека обичната заштита на т.н. свиркачи е недоволна бидејќи тие се однесуваат на нелегални активности, додека многу од ризиците за кои се загрижени вработените сè уште не се регулирани.

Во својот сет на предлози, вработените бараат од компаниите за вештачка интелигенција да се обврзат да забранат обврзувачки договори во однос на прашања поврзани со ризици и да создадат проверлив анонимен процес за персоналот да отвора прашања со одборите на компаниите, како и со регулаторите. Предлозите исто така повикуваат компаниите да се воздржат од одмазда кон сегашните и поранешните вработени што јавно споделуваат информации за ризиците откако веќе ги исцрпиле другите внатрешни процеси.

Во моментов нема коментари за веста. Биди прв да коментира...

Остави коментар