.webp){kind=icon}
„Луфтханза“ (Lufthansa AG), најголемата европска авиокомпанија, следната година ќе воведе доплата и до 72 евра по лет за да ги покрие зголемените трошоци за алтернативни горива потребни за намалување на штетните емисии на авионите.
Додадените давачки ќе се применуваат за сите поаѓања од Европската Унија, Велика Британија, Норвешка и Швајцарија, од 1 јануари, се наведува во соопштението на компанијата од вторникот. Тие ќе започнуваат од 1 евро, а точната сума ќе зависи од маршрутата и билетот.
Новите такси се совпаѓаат со регулативите на ЕУ што бараат од авиокомпаниите да користат најмалку 2 отсто одржливи воздухопловни горива почнувајќи од 2025 година. „Луфтханза“ соопшти дека не може сама да ги поднесе трошоците. Во 2022 година конкурентот „Ер Франс-КЛМ“ воведе доплата до 24 евра за летови од Франција и од Холандија.
Авиоиндустријата има цел да достигне нето нула емисии на јаглерод до 2050 година, цел што се потпира на масовно зголемување на т.н. одржливи горива за воздухопловство, кои обично се направени од растителни или отпадни материи.
Авијацијата е една од најтешките индустрии за декарбонизација, а трошоците, кои се проценува дека ќе достигнат трилиони, веројатно ќе бидат пренесени на клиентите. Додека Европа воведе мандати што постепено се зголемуваат во наредните децении, САД досега се потпираа на стимулации за да генерираат повеќе САФ (SAF) производство.
Голем број авиопревозници, вклучувајќи ги „Јунајтед ерлајнс“ (United Airlines Holdings Inc.), „Изиџет“ (EasyJet Plc) и самата „Луфтханза“, која исто така ги поседува „Свис“ (Swiss), „Аустриан ерлајнс“ (Austrian Airlines) и „Брисел ерлајнс“ (Brussels Airlines), претходно воведоа доброволни такси за покривање на трошоците како што се САФ или надомести за јаглерод.
