„Макпетрол“ оствари добивка од 7,1 милиони евра за шест месеци

„Макпетрол“ во првата половина од 2024 година оствари добивка по оданочување од 441,34 милиони денари (7,1 милиони евра), што е зголемување од 42 проценти во однос на истиот период минатата година и 30 проценти над планот за овој период од годината.

„Главната причина поради која е надминат планот за работење на друштвото за 2024 година е значајно зголемената продажба во малопродажниот сегмент. Дополнително во текот на првото полугодие дел од оперативните трошоци на друштвото се оптимизираа“, соопшти компанијата.

Во текот на првото полугодие од 2024 година, „Макпетрол“ бележи раст на вкупните приходи од 3,47 проценти.  

„Во структурата на приходите, најголем удел со 98,68 проценти имаат приходите од продажба, од кои 97,48 проценти се остварени преку продажба на домашен пазар, а само 1,2 проценти се остварени преку продажба на странски пазар, односно преку извоз на млазно гориво“, објаснуваат од компанијата.

Како што велат од „Макпетрол“, растот на приходите, споредбено со минатата година, во најголем дел се должи на зголемените приходи на мало за 10,1 проценти, а истите учествуваат со 90 проценти во приходите од продажба.

„Главна причина за зголемувањето на приходите на мало е лидерската позиција на малопродажниот пазар на деривати каде се зголеми количествениот промет за седум проценти. Дополнително во согласност со стратегијата, а со цел задоволување на потребите на потрошувачите кои секогаш се во фокусот, друштвото го прошири малопродажниот асортиман кој се нуди на бензинските станици, а прометот со истиот се зголеми за 17 проценти“, наведуваат од „Макпетрол“.

Наспроти нив приходите на компанијата од големопродажниот сегмент бележат пад од 33,4 проценти во најголем дел поради намалениот промет со млазно гориво и природен гас.

Вкупните расходи на компанијата во овој период се зголемени за 2,49 проценти.

„Растот во најголем дел се должи на зголемените расходи за набавна вредност на трговски стоки од 1,97 проценти, поради зголемениот количествен промет со нафтени деривати во споредба со мината година. Набавната вредност го следи трендот на приходите од продажба, што е неминовно со оглед дека истата во апсолутен износ е најголем дел од приходите од продажба, односно зафаќа околу 86 проценти од истите“, велат од компанијата.

Оттаму додаваат дека како и во минатото, во првото полугодие од 2024 година, економијата на земјата се наоѓа во незавидна ситуација поради скромниот раст, високата инфлација, политичките предизвици и надворешните глобални неизвесности и конфликти.

„Очекуваниот раст на БДП е околу 2,6 проценти, што претставува мало подобрување во однос на претходните кризни години, но сè уште е под очекуваното во споредба со регионот. Овој скромен раст е поддржан од зголемувањето на домашната потрошувачка и владините расходи, кои воедно резултираат и со одржување на каматните стапки на високо ниво од страна на НБРСМ со цел контрола на инфлацијата која се покажа како доста упорна во последните години“, наведуваат од компанијата.

Од компанијата посочуваат дека локалното и глобалното опкружување неминовно влијаеа и врз работењето на „Макпетрол“.

„Но, како резултат на посветеноста и ангажираноста на раководството и вработените, во текот на првото полугодие 2024 година друштвото обезбеди непрекинато снабдување на македонскиот пазар со високо квалитетни нафтени деривати и природен гас. И покрај сите предизвици, во текот на 2024 година, „Макпетрол“ АД оствари извонредни резултати и се задржа на лидерската позиција пред се поради лојалните потрошувачи и малопродажната мрежа“, велат од компанијата.

Од компанијата додаваат дека во согласност со растот на „Макпетрол“, во текот на 2024 година на компанијата и се приклучиле 157 нови вработени.

„Очекувањата за деловната 2024 година се во согласност со планот за работење на друштвото, кој се очекува да биде достигнат, а дури и надминат“, велат од компанијата.