.webp){kind=icon}
„Бајтденс“ (ByteDance), кинеската компанија што е сопственик на Тикток (TikTok), преговара со банките за заем од 9,5 милијарди долари, што би било најголемиот корпоративен заем во долари во Азија (со исклучок на Јапонија), изјавија за „Блумберг“ (Bloomberg) извори запознаени со ситуацијата во компанијата.
„Ситигруп“ (Citigroup), „Голдман Сакс“ (Goldman Sachs) и „ЏП Морган“ (JPMorgan) ќе го координираат задолжувањето, а рокот на заемот ќе биде три години, со можност за продолжување на пет години, додадоа изворите, кои сакаа да останат анонимни бидејќи информацијата сè уште не е објавена.
„Бајтденс“ ќе преземе повеќе долгови отколку што претходно се очекуваше и ќе се обиде да ја искористи моменталната ситуација на кредитниот пазар во Азија, каде што ликвидноста е висока, но кредитната активност опаѓа.
Обемот на заеми во долари во Азија (без Јапонија и меѓукомпаниските заеми) падна за 44 отсто, на околу 45,5 милијарди долари во првата половина од годината. Тоа е најниско ниво од 2010 година, покажуваат податоците собрани од „Блумберг“.
Кинеската компанија не одговори на барањето за коментар.
„Бајтденс“ ќе ги искористи средствата од заемот за рефинансирање на постоен заем од пет милијарди долари од 2021 година и за обртни средства, според извори на „Блумберг“.
Новиот заем може да се зголеми подоцна, додаваат изворите, истакнувајќи дека почетната каматна маржа ќе биде за 85 базични поени повисока од каматната стапка СОФР (SOFR).
„Бајтденс“ е основана во 2012 година и е со седиште во Пекинг. Апликацијата Доујин (Douyin) донесе голем успех на полето на социјалните мрежи каде што се споделуваат видеосодржини. Исто така, компанијата е матична компанија на Тикток, платформа што е исклучително популарна во САД, но исто така стана точка на расправија меѓу Вашингтон и Пекинг.
Нејзините планови вклучуваат проширување надвор од основните бизниси, вклучувајќи и е-трговија и вештачка интелигенција. „Бајтденс“ е меѓу групата големи кинески компании што инвестираа многу во развојот на јазични модели базирани на вештачка интелигенција. По успехот во САД, планира да лансира платформа за онлајн шопинг и во Европа.
