Империјата на Маск ризикува да биде цел на ЕУ при потенцијални казни за X

Европската Унија ја предупреди платформата X дека може да пресмета казни против неа, при што би се вклучиле и приходите од другите бизниси на Илон Маск, како „Спејс екс“ (Space Exploration Technologies Corp.) и „Неуралинк“ (Neuralink Corp.), пристап што значително би ги зголемил потенцијалните казни за прекршување на правилата за модерирање содржина.

Според Законот за дигитални услуги на ЕУ, блокот може да ги казни онлајн платформите со казни до шест проценти од нивниот годишен глобален приход за неуспех во справувањето со нелегална содржина и дезинформации или непочитување на правилата за транспарентност. Регулаторите разгледуваат дали продажбите од „Спејс екс“, „Неуралинк“, „Екс еј-ај“ (xAI) и „Боринг“ (Boring Company) треба да се вклучат покрај приходите генерирани од социјалната мрежа, за да се утврдат потенцијалните казни против X, велат луѓе запознаени со ова прашање, барајќи да не бидат идентификувани бидејќи информациите не се јавни.

Европската комисија го истражува X за неколку потенцијални прекршувања на Законот за дигитални услуги, новововедени правила чија цел е да обезбедат платформите да ја контролираат нелегалната содржина. ЕУ предводи глобална акција против штетните онлајн содржини и дезинформации, што предизвика сè погласни реакции од Маск, кој рече дека таквите мерки ја ограничуваат слободата на говор.

X е приватна компанија под целосна контрола на Маск. Со разгледувањето на приходите од неговите други компании, комисијата суштински разгледува дали самиот Маск треба да се смета за ентитет што треба да се казни наместо X, велат изворите. Продажбите на „Тесла“ (Tesla Inc.) би биле исклучени од оваа пресметка бидејќи е јавно тргувана и не е под целосна контрола на Маск, рече еден од упатените.

Комисијата сè уште не одлучила дали да го казни X, а големината на потенцијалната казна и натаму е под дискусија, велат луѓето. Казните може да се избегнат ако X најде начини да ја намали загриженоста кај надзорниот орган.

X исто така би имал можност да ја оспори секоја одлука на ЕУ, но конечниот збор го има комисијата, велат луѓето. X не одговори на барањата за коментар. Маск претходно на X посочи дека ќе се бори против секоја казна преку „многу јавна битка на суд“.

Прегледот на X започна под раководство на Тиери Бретон, поранешниот „технолошки цар“ на ЕУ, кој често се расправаше со Маск онлајн и му беа доделени посебни овластувања за спроведување на Законот за дигитални услуги без потреба од печат на комисијата. По оставката на Бретон во септември, тој ги пренесе своите овластувања за казнување на шефицата за конкуренција и дигитални прашања Маргрете Вестагер. Одлуките за казните и како тие се пресметуваат на крајот ќе бидат во рацете на Вестагер.

„Обврските според Законот за дигитални услуги се адресирани до давателот на многу голема онлајн платформа или многу голем онлајн пребарувач“, рече портпаролот на комисијата Томас Реније. „Ова важи без оглед дали ентитетот што врши одлучувачко влијание врз платформата или пребарувачот е физичко или правно лице“. Реније не даде дополнителни објаснувања за овој конкретен случај.

Во моментов нема коментари за веста. Биди прв да коментира...

Остави коментар