Струмичката компанија „Тотал инженеринг“ има намера да ги преземе друштвата „Герас Цунев-трговија“ и „Герас Цунев-конфекција“. Управителот на „Тотал инженеринг“, Вице Заев, кој е брат на поранешниот премиер Зоран Заев веќе испратил допис во кој двете друштва се информираат за намерата да се објави понуда за преземање по цена од 310 денари за акција. Понудата за преземање ќе биде објавена откако ќе биде одобрена од Комисијата за хартии од вредност.
По објавата на намерата за преземање, Македонската берза ги прошири причините поради кои двете друштва се ставени на „листата на набљудување“.
Имено, друштвата „Герас Цунев-конфекција“ АД Струмица и „Герас Цунев- трговија“ АД Струмица на 30.05.2022 година беа внесени на „листата за набљудување“ поради донесени одлуки од собрание на акционери за преобразба на акционерските друштва во друштва со ограничена одговорност (д.о.о.)
„На 25.10.2024 година издавачите ‚Герас Цунев-конфекција‘ АД Струмица и ‚Герас Цунев – трговија‘ АД Струмица преку СЕИ-Нет објавија известувања за примена намера за преземање на друштвата. Имајќи предвид дека друштвата веќе се внесени на „листата за набљудување“, донесен е заклучок за проширување на причините за внес на издавачите на „листата за набљудување“, поради причината објавена намера за преземање на друштвото“, соопшти берзата.
Инаку, според податоците на Централниот депозитар за хартии од вредност „Тотал инженеринг“ веќе се јавува како акционер во двете друштва кои се цел на преземање. Компанијата поседува 24,97 проценти од вкупниот број акции во „Герас Цунев – конфекција“ и 24,98 проценти од акциите во „Герас Цунев – трговија“.
.webp){kind=icon}