Велика Британија се соочува со највисоки трошоци за задолжување од 1998 година наваму

Обединетото Кралство се подготвува да ги плати највисоките трошоци за задолжување при продажба на државен долг најмалку од 1998 година наваму, откако глобалната распродажба на обврзници ги зголеми приносите и дополнително ги оптовари јавните финансии.

Според лица запознаени со трансакцијата, кои побарале анонимност, земјата го нуди реперниот пакет обврзници со доспевање во јануари 2056 година со принос од околу 0,75 до 1 базичен поен над приносот на државната обврзница со доспевање во 2055 година. Тоа би претставувало највисок принос за која било продажба на британски државни обврзници откако во 1998 година е формирана Канцеларијата за управување со долгот (Debt Management Office).

Приносите на британските обврзници се движат околу највисоките нивоа во последните децении, откако глобалната распродажба на обврзници меѓу развиените економии во изминатите недели најсилно ги погоди токму британските хартии од вредност. Зад овој тренд стојат стравувањата од инфлаторен шок предизвикан од енергетските цени, растечките буџетски дефицити и влијанието на големите издавања корпоративен долг од компании поврзани со бумот на вештачката интелигенција.

Сегашната трансакција, која се очекува да биде финализирана подоцна во вторник, претставува дополнително издавање на обврзници во вредност од 5,9 милијарди фунти, првично продадени во мај 2025 година со принос од 5,405 отсто, што тогаш беше рекорд за синдицирана продажба. Според стратегот на „РБЦ КАпитал маркетс“, Мегум Мухиќ, понудата би можела да обезбеди до 5 милијарди фунти нови средства. Приносот на постојните 30-годишни британски обврзници во вторникот изнесуваше 5,83 отсто, откако минатата недела достигна највисоко ниво од мај 1998 година.

Bloomberg Mercury

И други земји неодамна плаќаа високи каматни стапки за задолжување. Минатиот месец САД продадоа 30-годишни обврзници на аукција со највисока камата од 2001 година, додека Германија во синдицирана продажба плати највисок принос од 2011 година. Минатата недела Велика Британија продаде 900 милиони фунти индексно поврзани 25-годишни обврзници со рекорден принос од 2,496 отсто.

Повисоките трошоци за задолжување создаваат дополнителен притисок врз британскиот министер за финансии Џон Хили во пресрет на следниот буџет, кој треба да биде претставен наредниот месец. Според проценките на „Блумберг економикс“, фискалниот простор на владата во рамките на нејзините буџетски правила е преполовен од пролетта наваму, односно намален за 23,6 милијарди фунти, токму поради растот на приносите на обврзниците.

Во своето прво големо обраќање како министер за финансии, Хили изјави дека ќе ги продолжи напорите на својот претходник за обновување на довербата во Обединетото Кралство на меѓународните пазари на обврзници. Фискалната дисциплина, рече тој во понеделникот, „е основата што стои зад секое ветување на оваа влада“.

Нето-долгот на британскиот јавен сектор како удел во бруто домашниот производ се зголемил од околу 85 отсто во фискалната 2019-2020 година на нешто повеќе од 94 отсто на крајот од јули, што претставува највисоко ниво од 1960-тите години, според Националниот завод за статистика. Во јули, трошоците за сервисирање на долгот достигнале 7,7 милијарди фунти, а според Библиотеката на Долниот дом на Парламентот, во фискалната 2025-2026 година дури 8 пени од секоја владина фунта биле потрошени за камати на долгот.

Премиерот Енди Барнам минатиот септември изјави дека Велика Британија не треба да биде „заложник на пазарите на обврзници“, но откако во јули стапи на должност во Даунинг стрит, вети дека ќе се придржува до фискалните правила на земјата, истовремено барајќи и одредена „флексибилност“ во нивната примена.