Во блок трансакција вредна 417,9 милиони денари (6,7 милиони евра) денеска на Македонската берза се продадоа 30.741 акција од „Македонијатурист“ АД Скопје коишто претставуваат 6,80 проценти од основната главнина на друштвото. Акциите се продадоа по цена од 13.597 денари за акција, којашто е многу повисока од просечната цена од 7.501 денар по која вчера се тргуваа акциите на компанијата.
Со оваа блок трансакција продолжува низата мултимилионски продажби на акции во „Македонијатурист“. „Блумберг Адрија“ минатата недела објави дека „Скопски пазар“ стана втор најголем акционер во „Македонијатурист“ откако ги купи акциите на „Изо стоне“ и стана сопственик на 9,9 проценти од вкупниот број акции на компанијата. Според нашите извори, кои се добро запознаени со оваа проблематика, но сакаат да останат анонимни, „Скопски пазар“ со овој чекор станува директен конкурент на „МГ фешн“, компанија што е дел од „Фешн груп“ во обидите за окрупнување на сопственичкиот капитал во „Македонијатурист“. „Блумберг Адрија“ веќе пишуваше дека по низа блок трансакции „МГ фешн“ купи 7,69 проценти од вкупниот број акции од „Македонијатурист“.
Неизвесно по денешната блок трансакција е каква ќе биде промената на листата големи акционери, на која засега на првото место и понатаму е Доне Таневски, кој поседува 23,4 проценти од вкупниот број акции во „Македонијатурист“, а меѓу другите поголеми акционери се Симеон Павлов, кој поседува 8,19 проценти од вкупниот број акции, „Сава пензиски фонд“ (8,8 проценти) и „Македонијатурист“, која поседува 10 проценти сопствени акции.
Прочитај повеќе
„Скопски пазар“ стана втор најголем акционер во „Македонијатурист“
„Скопски пазар“ ја претекна „МГ фешн“ на листата најголеми акционери во „Македонијатурист“.
14.11.2024
„МГ Фешн“ влезе во сопственичката структура на „Македонијатурист“
Компанијата која е дел од „Фешн груп“ купила 7,69 проценти од вкупниот број акции од „Македонијатурист“.
11.11.2024
Продаден блок акции од „Македонијатурист“ за 9,1 милиони евра
Се продадоа 50.953 акции коишто претставуваат 11,27 проценти од основната главнина на друштвото.
30.10.2024
Продадени акции од „Македонијатурист“ за 2,1 милиони евра, берзата прашува што се случува?
Македонската берза побарала од компанијата одговор дали има необјавени ценовно чувствителни информации кои би влијаеле на цената на акциите.
07.10.2024
Според нашите извори, на потег е Таневски, кој ќе треба брзо да реагира и да се одлучи за една од двете страни што ги купуваат акциите во „Македонијатурист“, со оглед на тоа што неговата позиција во сопственичката структура на компанијата е, условно кажано, ослабната откако неговата долгогодишна деловна соработничка Соња Бибановска за 9,1 милиони евра ги продаде своите акции, кои претставуваа 11,27 од вкупниот број акции во „Македонијатурист“. Битно е да се нагласи дека во битката за окрупнување на капиталот, сопствените акциите што ги поседува „Македонијатурист“ не се во игра бидејќи немаат право на глас.
.webp){kind=icon}
