„МГ Фешн“ влезе во сопственичката структура на „Македонијатурист“

„МГ Фешн“, компанија која е дел од групацијата „Фешн груп“ купила 7,69 проценти од вкупниот број акции од „Македонијатурист“, покажуваат податоците на Централниот депозитар за хартии од вредност. „Блумберг Адрија“ минатата недела објави дека во девет блок трансакции со вкупна вредност од 315,2 милиони денари (5,1 милиони евра) на Македонската берза се продадоа вкупно 33.187 акции од „Македонијатурист“ АД Скопје. Станува збор за акции коишто претставуваат 7,34 проценти од од основната главнина на друштвото. Во сите блок трансакции акциите се продадоа по цена од 9.500 денари за акција.

Со оваа купопродажба повторно дојде до значителна промена во групата големи акционери во „Македонијатурист“ која следуваше по низа мултимилионски блок трансакции со акциите на компанијата во изминатиов период. Имено, „Блумберг Адрија“ неодамна пишуваше дека Соња Бибановска е акционерката којашто во блок трансакција на Македонската берза вредна 564 милиони денари (9,1 милиони евра) продаде 50.953 акции од „Македонијатурист“ АД Скопје коишто претставуваат 11,27 проценти од основната главнина на друштвото. Акциите се продадоа по цена од 11.070 денари за акција, којашто е значително повисока од просечната цена по која се тргуваа акциите на компанијата во изминатиов период. Со оваа трансакција Бибановска, излезе од сопствечката структура на „Македонијатурист“, а истовремено, Симеон Павлов, кој поседуваше 5,01 проценти од акциите сега поседува 8,19 проценти од вкупниот број акции. 

Претходно објавивме дека тетовската градежна компанија „Изо стоне“ (Izostone) влезе во сопственичката структура на „Македонијатурист“. Според податоците на Централниот депозитар за хартии од вредност, тетовската компанија поседува 6,62 проценти од вкупниот број акции на „Македонијатурист“.  

Засега нема промена кај останатите поголеми акционери кои поседуваат над пет проценти од акциите односно Доне Таневски поседува 23,4 проценти од вкупниот број акции, „Сава пензиски фонд“ поседува 8,8 проценти и „Македонијатурист“ посеудва 10 проценти од акциите.

Инаку, „Фешн груп“ важи за групација која се занимава со повеќе дејности. Таа е увозник на повеќе светски брендови облека во Македонија, а активна е и во градежниот сектор и во моментов го гради трговско-станбениот комплекс „Гранд“ во строгиот центар на Скопје.

Во моментов нема коментари за веста. Биди прв да коментира...

Остави коментар