Доне Таневски купи акции од „Македонијатурист“ за 866.000 евра

Претседателот на Надзорниот одбор на „Македонијатурист“ АД Скопје, Доне Таневски се стекна со 8.667 обични акции издадени од компанијата и сега поседува 97.249 обични акции, односно 21,50 проценти од главнината на друштвото.

Таневски ги купи акциите во петокот во две трансакции со вкупна вредност од 53,3 милиони денари (866.000 евра). Акциите беа продадени по цена од 6.150 денари (100 евра) за акција.

Ова е втора поголема промена во сопственичката структура на компанијата. „Блумберг Адрија“ веќе пишуваше дека на 12 април годинава во блок-трансакција вредна 127,3 милиони денари (два милиона евра) се продадоа 20.708 обични акции од „Македонијатурист“ АД Скопје. Станува збор за 4,58 проценти од основната главнина на друштвото. Тогаш, акциите исто така се продадоа по цена од 6.150 денари (100 евра) за акција.

Инаку, според податоците на Централниот депозитар за хартии од вредност заклучно со 20 мај годинава Таневски поседуваше 19,59 проценти од акциите на друштвото, а меѓу останатите акционери кои поседуваат над пет проценти од главнината се Соња Бибановска (11,27 проценти), „Македонијатурист“ (10 проценти) и „Сава пензиски фонд“ (8,8 проценти).

„Македонијатурист“ во текот на 2023 година оствари добивка по оданочување од 96,3 милиони денари (1,5 милиони евра) која е неколкукратно зголемена во однос на 2022 година кога изнесувала 30,8 милиони денари (502.000 евра).

Вкупните приходи во 2023 година се зголемени за 28,25 проценти додека пак приходите од продажба на друштвото се зголемени за 32 проценти. Вкупните трошоци и расходи од работењето се зголемени за пет проценти во однос на 2022 година.

„Со оглед на тоа дека цената на електричната енергија и останатите енергенти е значително зголемена во однос на минатите периоди и нејзиното учество е големо во вкупните трошоци, друштвото превзема низа мерки со цел намалување на негативните ефекти од зголемувањто на трошоците“, информираа од компанијата. 

Оттаму додадоа дека една од најзначајните мерки е инвестициската активност за поставување на фотонапонски централи на дел од подружниците.

„Со оваа инвестициска активност се очекува да се намали негативниот ефект од зголемената цена на електричната енергија во наредните периоди“, велат од компанијата.

Од „Македонијатурист“ во текот на дванаесетте месеци од 2023 година има нови вложувања во износ од 60.451.487 денари (околу милион евра) од кои во најголем дел се однесуваат на инвестициска активност за целосно реновирање на конференциските сали во склоп на хотелот „Холидеј Ин“, како и на поставување фотонапонски централи во рамките на подружниците хотел „Белви“, хотел „Карпош“ и во рамките на поранешниот хотел „Сарај“. 

„Целосно се завршени и пуштени се во функција фотонапонските централи во хотел „Карпош“ и хотел „Сарај“, додека пак фотонапонската централа во хотел „Белви“ е завршена во целост, а ќе биде пуштена во функција откако ќе се добијат потребните одобренија од надлежните органи“, посочија од компанијата.

„Македонијатурист“ лани извршила вложувања во износ од 165.609.015 денари (2,6 милиони евра) во државни обврзници, како и 3.266.427  денари (50.000 евра) во хартии од вредност расположиви за продажба.