Продадени акции од „Македонијатурист“ за 2,1 милиони евра, берзата прашува што се случува?

Во блок трансакција вредна 133,5 милиони денари (2,1 милиони евра) денеска на Македонската берза се продадоа 14.054 акции од „Македонијатурист“ АД Скопје коишто претставуваат 3,11 проценти од основната главнина на друштвото. Акциите се продадоа по цена од 9.500 денари за акција, што е значително повеќе од просечната цена по која се тргуваа акциите во изминатиов период. Од „Македонијатурист“ денес по барање на Македонската берза за објавување на ценовно чувствителни информации кои не се објавени, а кои можат да имаат влијание на формирањето на пазарната цена на акциите, информираа дека не поседуваат ценовно чувствителни информации во врска со работењето кои досега не се објавени.

Драстичен раст на цената на акциите

„Македонијатурист“ е една од компаниите на Македонската берза што бележат континуиран раст на вредноста на акциите. Според податоците на берзата, акцијата на „Македонијатурист“ на почетокот на годинава се тргувала по просечна цена од 4.774 денари, а деновиве просечната цена достигна над 9.000 денари.

Со денешната блок транскација со акциите на „Македонијатурист“ продолжува низата тргувања со „тешки“ блокови акции од компанијата. „Блумберг Адрија“ минатата недела пишуваше дека во три блок трансакции со вкупна вредност од 108,7 милиони денари (1,7 милион евра) беа истргувани вкупно 13.702 акции од „Македонијатурист“ АД Скопје. Во блок трансакција вредна 66,5 милиони денари (околу милион евра) беа истргувани 8.321 акција, кои претставуваат 1,84 проценти од основната главнина на компанијата. Акциите се продадоа по цена 8.000 денари за акција. Претходно, во една блок трансакција вредна 22,9 милиони денари (373.000 евра) беа истргувани 2.981 акција од компанијата, кои претставуваат 0,66 проценти од нејзината основна главнина. Акциите се продадоа по цена од 7.700 денари за акција. Во друга блок трансакција вредна 19,2 милиони денари (312.000 евра) се истргуваа 2.400 акции од „Македонијатурист“, кои претставуваат 0,53 проценти од основната главнина на компанијата. Акциите се продадоа по цена од 8.000 денари за акција.

Доне Таневски ја зголеми сопственоста

Во меѓувреме, „Македонијатурист“ објави дека Доне Таневски, претседател на Надзорниот одбор на компанијата се стекнал со 5.381 обична акција издадени од компанијата и сега поседува 105.829 обични акции, односно 23,40 проценти од вкупниот број издадени акции.

Компанијата важи за една од најголемите во хотелско-услужната дејност во земјава и е сопственик на хотелите „Холидеј ин“, „Бест Вестерн“, „Карпош“, „Водно“, „Белви“, „Бристол“ и „Јадран“. Во изминатиов период „Македонијатурист“ бележи одлични резултати, успешно ја надмина кризата предизвикана од ковид-19 и постојано работи со добивка.

Податоците на Централниот депозитар за хартии од вредност откриваат промени во сопственичката структура на „Македонијатурист“ во текот на 2024 година. Во јануари годинава меѓу акционерите што поседувале над пет проценти од акциите биле евидентирани „Сава пензиски фонд“, во чија сопственост биле 8,80 проценти од вкупниот број акции, „Македонијатурист“ (10 проценти), Доне Таневски (19,59 проценти) и Соња Бибановска (11,27 проценти). Заклучно со 7 октомври годинава на оваа листа е приклучен и Симеон Павлов, кој во меѓувреме купи 5,01 проценти од вкупниот број акции на компанијата, а истовремено Доне Таневски ја зголеми сопственоста од 19,59 на 23,40 проценти од вкупниот број акции на компанијата.