„Хонда“ и „Нисан“ најавија спојување во 2026 година

„Хонда“ (Honda Motor Co.) и „Нисан“ (Nissan Motor Co.) ги направија своите први историски чекори кон спојување и создавање нова сила во светската автомобилска индустрија, додека агресивната конкуренција од Кина ги принудува традиционалните производители на автомобили да ги преиспитаат своите деловни модели.

Двата јапонски производитела на автомобили во понеделникот потпишаа првичен договор за преговори за спојување, што беше објавено на заеднички брифинг за медиумите во  „Токио“. „Хонда“ исто така изјави дека ќе откупи свои акции во вредност до 1,1 трилион јени (7 милијарди долари).

Прочитајте повеќе: Накратко од светот: Фед веројатно ќе крати, можно спојување на „Нисан“ и „Хонда“

Ќе се создаде холдинг компанија за новиот ентитет, која треба да биде листирана до август 2026 година, со напомена дека „Хонда“ ќе може да номинира мнозинство од директорите на холдинг компанијата.

„Мицубиши“ (Mitsubishi Motors Corp.), која е 24,5 отсто во сопственост на „Нисан“, исто така го потпиша меморандумот за разбирање и ќе биде дел од групата.

Таквиот сојуз би довел до создавање на третиот најголем производител на автомобили во светот, ставајќи го триото против „Тојота“ (Toyota Motor Corp.) на домашниот пазар и кинеските производители на автомобили, вклучувајќи ги БЈД (BYD Co.) и „Гили“ (Geely Automobile Holdings Ltd.) од странство. „Тојота“ има удели во „Субару“ (Subaru Corp.), „Сузуки“ (Suzuki Motor Corp.) и во „Мазда“ (Mazda Motor Corp.), правејќи моќна група на брендови поддржана од нејзиниот врвен кредитен рејтинг.

Bloomberg

Сите три јапонски компании до некој степен се соочуваат со егзистенцијална закана предизвикана од брзото преминување на глобалната автомобилска индустрија кон електрични возила со батерии и хибридни погонски системи и оддалечување од автомобили со мотори со внатрешно согорување.

Во Кина растечката популарност на локално произведените електрични возила ги принудува странските брендови да се борат за опстанок, а јапонските производители на автомобили таму се заглавени со преголем капацитет. „Хонда“ и „Нисан“ мораа да ги намалат персоналот и производството, додека „Мицубиши“ речиси целосно се повлече од Кина, најголемиот автомобилски пазар во светот.

Во меѓувреме порастот на продажбата на хибридни бензинско-електрични автомобили во Северна Америка го остави „Нисан“ во неповолна положба, додека „Тојота“, пионер во хибридната технологија, доби добредојден поттик. „Нисан“ ја пропушти таа можност поради својата застарена производствена линија, која немаше атрактивни опции за хибриди, а уште помалку конкурентни електрични возила.

За „Нисан“ спојувањето со „Хонда“ би можело да обезбеди олеснување по слабата продажба во САД и во Кина, што предизвика огромен пад на приходите, принудувајќи го ослабениот производител на автомобили да ги намали работните места, да го намали производствениот капацитет и да ја намали годишната прогноза за профит за 70 отсто.

„Нисан“ беше спасен од својата последна финансиска криза пред повеќе од две децении кога францускиот производител на автомобили „Рено“ (Renault SA) влезе со парична инјекција и го испрати Карлос Гон да организира пресврт. Шокантното апсење и отстранување на Гон кон крајот на 2018 година го отвори патот за Макото Учида да го преземе кормилото.